Fundacion Alzheimer Aruba lo conmemora 20 aña di Siman di Cinta Teal

Dia 21 di september proximo ta exactamente 20 aña pasa cu a inaugura “Siman di Cinta teal/Teal Ribbon Week, hustamente pa trece conscientisacion bou nos comunidad p’e trastorno di Alzheimer. E tempo ey a inaugura e siman aki na Playa Linda. Awe 20 aña despues Fundacion Alzheimer Aruba a invita prensa pa un reunion, p’asina sigui conscientisa nos comunidad riba e ultimo desaroyo y state of the art di e diferente tipo di trastornonan neurocognitivo, incluso esunnan di e tipo Azheimer. E condicion di e tipo Alzheimer no t’e unico trastorno neurocognitivo. Y no pasobra un hende ta lubida cu e tin Alzheimer. E ultimo tempo hopi ta esunnan cu a sali cu mas pregunta cu contesta fo’i oficina di dokter. Esaki a bira ainda mas serio durante y despues di e pandemia.

Segun Melva Croes-Yanez, neuropsicologo y presidente y fundado di Fundacion Alzheimer Aruba, diaranson, cu ta dia mundial di Alzheimer, lo tin un anochi di cine cu intercambio cu sala. E pelicula lo ta uno basta realistico y ta spera cu e por impacta e personanan presente, cuminsando pa 7:00 pm den Cas di Cultura sala chikito. Hoben di 13 aña pariba ta mas cu bon bini pa por participa. E evento aki lo ta uno gratis.

Fuera di esey lo bay tin un Santo Sacrificio di Misa p’asina observa e dia di cinta Teal.

Dia 22 di september, esta diahuebs, lo tin e anochi di lectura fo’i 7:00 pm. Esaki lo tuma luga den Centro di Bario Savaneta.

E santo Sacrificio di Misa ta cera e siman di conscientisacion, lo ta n’e parokia di Savaneta pa 7:00 pm.

F.A.A. ta invita henter comunidad di Aruba pa participa n’e eventonan aki y pa cera cabes hunto pa cos bay mas optimal p’asina yuda e personanan cu tin e condicion di e tipo Alzheimer.