Frans Ponson (CUA): Parlamentario tin cu stop di gaña pueblo riba prijs di cuminda 

Ademas di e discusion entre Gobierno y comercio, Comerciantenan Uni di Aruba (CUA) ta lamenta e publicacion di un parlamentario acusando comercio di abusa di prijs, ya cu no tin invoerrechten riba carni, cu alcohol ta caro. 

Frans Ponson, Presidente di CUA, a cuminsa na bisa cu di berdad riba carni, no tin invoerrechten. Pero tin un porcentahe cu mester paga na Veterinaire Dienst. Por dun’e cualkier nomber, pero e ta un gasto p’e comerciante. Door di bisa cu no tin invoerrechten, di un manera toch ta gañando pueblo. Un biaha mas ta trece pleito entre comercio y pueblo. E gasto no ta yama invoerrechten, mescos cu alcohol. Tin un invoerrechten cu ta masha abou. Pero tin un alcohol accijns cu ta sumamente halto, unda cu Aruba ta un di e paisnan cu tin un accijns asina halto riba alcohol. E ta un gasto di tur manera, pa comercio. 

Sorto di publicacionnan asina, ta malinforma pueblo. Tur e gastonan cu ta bin ta cay pa e comerciante. Tur e mal informacionnan aki ta mustra cu e comerciante ta abusa. Tur hende tin un telefon den nan man, unda cu nan por wak e prijs di comercio na Aruba. Hopi biaha tin critica, ta kere cu ta asina facil, e ora cada ken por hipoteca nan cas y asina lanta nan negoshi y hacie miho. 

Tur gobierno mester stop di trece discordia, mester bin c’un miho manera pa por yega na otro. Esun cu ta hisa e prijsnan, ta gobierno. Por wak e den gasoline, den coriente y awo den e canasta basico. “Comercio ta compronde gobierno, pero gobierno tambe mester compronde e pakico e comerciante mester pas’e pa e pueblo y no busca un otro guera entre comerciante y e pueblo,” Francis Saladin, vice-presidente di CUA a finalisa bisando.