Francis Saladin (CUA): Gobierno no ta interesa pa tende solucion

Comerciante Uni Aruba (CUA) ta recorda cu na 2019 gobierno a bisa cu BBO ta subi cu 6% temporalmente, pero awo esaki no ta asina mas. Pa otro aña e ta bira 7%, pero segun nan esaki ta bay na 7,52%.

Francis Saladin, vice-presidente di CUA, a indica cu den pueblo tin pensamento eroneo cu consumido so ta paga BBO. Pero realidad ta cu compania tambe ta paga BBO, pasobra nan tambe ta haci uzo di servicio, y/of ta cumpra producto. Nan tambe uza servicio manera chica pos of ora tin di cumpra piesa pa truck, entre otro, nan tambe ta paga e BBO manera consumido.

Esey ta pone cu e comerciante su prijsnan tambe ta subi, nan gasto tambe ta subi, nan costo pa opera empresa ta subi. Hopi bes gobierno ta tilda comercio cu nan ta subi prijs. Ken ta esun cu a subi prijs? Pasobra no ta comercio ta esun cu a subi prijs. Gobierno ta esun cu a subi esaki cu 7,52%. Gobierno ta papia di 7%, pero realidad ta cobra comerciante 7% y ta entrega esaki, ta oke. Pero no ta asina, pasobra nan kier 7% riba e 7% tambe. Consecuentemente comerciante tin cu subi prijs pa cubri esey tambe, djey nan kier tilda comercio ta subi prijs.

Saladin a enfatisa cu comercio a subi prijs pa motibo cu a subi belasting. Gobierno su gastonan a subi, nan mester di mas placa y a coy e manera di mas facil pa subi BBO na luga di bay tra’i esunnan cu no ta cumpli. A splica gobierno cu tabatin otro alternativa, manera pa soluciona esaki. Gobierno no ta interesa, no kier tende. Nan ta pretende di sinta un biaha cu comercio, gaña tira santo den nan wowo manera ta haci esey cu pueblo.

Gobierno a sali cu 18% di BTW pa spanta hende, pero ta dal hende cu e 7% pa gaña bisa cu ta ganga a haya. Asina ey gobierno ta haci su wega y manipula pueblo, gaña pueblo y despues bisa cu comerciante a subi prijs. Si mira bon e ta un dobel gasto, pa motibo cu comercio su costo a subi. Esey ta pone cu comerciante tin di subi prijs pa cubri su gastonan cu tambe a subi. Segun Saladin, nan no por sigui absorba e gastonan. Nan a haya nan mes obliga ta subi e prijsnan pa cubri gasto, pero tambe pa motibo cu BBO a subi. El a enfatisa cu gobierno ta esun cu a subi prijs y no nan como comerciante.