Fraccion Raiz a entrega ley di iniciativa pa nombra un Ombudsman y Kinderombudsman

Riba 25 di october 2022, un ley di iniciativa pa regla nombramento y e tareanan di un Ombudsman y Kinderombudsman a wordo manda pa Raad van Advies.

Presidente di Parlamento, mr. Edgard Vrolijk a parti un concepto pa cu e ley aki. Despues di a revisa e concepto aki, parlamentario Misha Raymond a contribui cu algun cambio y a firma y entrega e ley hunto cu mr. Edgard Vrolijk y Shaliny Tromp Lee, BSc.

Oportunidad igual

Un cambio cu mi a propone ta un adicion na e tareanan di e Kinderombudsman, locual ta e tarea di promove oportunidad igual pa mucha y hoben. En general mucha y hoben ta den un posicion di dependencia pa cu nan mayornan y sociedad. Esaki ta inclui nan desaroyo. Un mucha of hoben no mester ta victima di su circunstancianan pa cu su bienestar y desaroyo.

Cu e cambio aki oportunidad igual pa mucha y hoben ta bira un punto di atencion specifico di e Kinderombudsman, creando un base adicional pa por investiga y duna recomendacionnan na bienestar di nos mucha y hobennan.

Manera ta conoci un base constitucional pa nombra un Ombudsman no a haya e sosten necesario di 2/3 parti den Parlamento. Cu e ley di iniciativa aki kier percura cu na 2023 Aruba porfin lo por haya un Ombudman y Kinderombudsman. Ta importante pa e pueblo di Aruba haya su defensornan pa asina percura cu e instancia- gubernamental y instancianan cu ta atende cu mucha, trata pueblo, nos muchanan, y nos hobennan na un forma husto.