Fraccion di MAS sa kico ta bay enfoca riba dje den e aña nobo

Pa fraccion di MAS, consistiendo di parlamentarionan Marisol Lopez-Tromp como lider y Aquanette Gunn, kende a cumpli cu prome aña den e funcion, e discurso di Su Excelencia Gobernador Alfonso Boekhoudt tabata falta pa menciona punto cu ta di importancia pa nan.

Marisol Lopez-Tromp a indica cu tin dos punto; e prome ta e parti financiero y palabracion cu Hulanda cu gobierno ainda no ta cumpliendo manera debe ser y consecuentemente ta pone Aruba den situacion cu nos ta awe. Cu esaki Lopez-Tromp ta referi na e posicion cu a pidi pa hala aden bek e presupuesto 2023 ya cu di e 13 puntonan cu CAFT a exigi, ta un so a cumpli cu ne. Consecuentemente a bin un carta cu proposicion y hasta pa aanwijzing. Mas aleu, tin e poder di compra caminda hopi hende ainda ta busca un trabou cu ta pas pa nan.

E di dos punto cu a resalta pa Lopez-Tromp y cu ta un ripiticion di aña pasa paso no tin cambio, ta e retonan cu tin pa mantene y cuida nos naturaleza. Esaki ta cay bou di cartera di RAIZ, pero ta mishi tambe cu otro cartera y e parlamentario di oposicion ta considera cu nan ta ticking timebombs, dunando como ehempel e dump na parkietenbos y e planta di Rioolwaterzuiveringsinstallatie (RWZI) na Bubali. E tabatin miyones presupuesta y awo diripiente e placa a bay otro caminda, treciendo e risico cu tin pa nos medio ambiente y tambe pa nos turismo.

Lopez-Tromp: “Mi ta haya esey algo di preocupacion y tambe ta wak ainda hopi destruccion di nos naturalesa, entre otro, door di cierto vehiculo cu te cu awe a pesar di cu tabatin un rapport, minister president no a publica e rapport aki y tampoco no a bin cu rutanan alternativo pa e vehiculonan cu ta trece daño na nos naturalesa tur dia y sinembargo e naturalesa aki ta algo cu nos mester keda cuida.” Un aña despues, ainda e parlamentario no ta wak un balans entre turistmo y naturalesa, ni tampoco stapnan concreto door di gobierno.

Di su banda, colega di fraccion, Aquanette Gunn a bay for di e ceremonia cu e impresion cu gobernador su discurso a falta pa menciona e plannan cu por tin pa cu enseñansa y salubridad. Maske a menciona cu tur mucha of hoben tin derecho, tambe mester tin accesibilidad na enseñanza. Teniendo na cuenta e situacion financiero cu nos pais ta aden, varios ta esunnan cu debi na e problema financiero, no por a cuminsa aña escolar manera debe ser.

Pa un relato mas amplio, lesa TREMPAN.