Fraccion di AVP a bandona sala: Croes y Wyatt so a keda te final

No obstante cu a spera un debate y bataya fuerte awe di parti oposicion den parlamento relaciona cu costo di bida, toch e fraccion mas grandi den oposicion a opta pa bay cas trempan! Faltando Benny Sevinger cu a bay pasa vakantie cu famia na Hulanda (despues di su caso penal) otronan tabata drenta sali. Pero pa 6:00 pm e dia di trabou a caba pa Mike Eman, Mike de Meza, Arthur Dowers, a nota cu solamente e dos damanan Gerlien Croes y Mervin Wyatt-Ras a opta pa keda te marduga den sala. 

Claro cu e kedamento te final den sala ta bin cu ne cu abo tin cu wanta delaster un insulto y critica di gobierno. Ta obvio cu pa e coalicion na mando, tur culpa di e costo di bida halto na Aruba ta sea di efectonan stranhero of di AVP. Na otro banda oposicion ta tilda e Gabinete Wever-Croes II di no ta maneha na drechi cu consecuencia cu tur cos a subi pareu riba nos isla. A subraya cu como pensionado, cobrado di onderstand of esunnan cu ta haya un handicapten uitkering lo tin e extra duro. 

E fraccion di AVP a habri e siman aki cu seis miembro en bes di shete. Rycond Santos do Nascimento a bira independiente y a bay cu e asiento. Bisando esey, e fraccion tin basta trabou pa haci pa por recupera confiansa bek den pueblo y crece politicamente. Pero a opta awe pa sigui maneha manera antes, esta di no ta debati den parlamento. E cuater miembro cu nan a yama “Old Boys Club” a goberna pa ocho aña caba y den nan mes ta pensa cu awo ta tempo pa e hobennan, manera Gerlien Croes, pa gana experiencia door di haya critica te marduga den parlamento. 

Pero kisas esaki mes lo ta un di e motibonan cu tin un diferencia di vision entre e grupo mas bieu y e hobennan. Nan ta bou di presion di votadonan cu ta bisa “oposicion ta morto” of “oposicion nunca ta den parlamento” y lo kier hacie diferente. E actitud ami mas bien ta mustra un AVP cansa y bati, cu ta core bay laga trabou. Ta den parlamento mester debati y brinda oposicion fuerte. Obvio cu tin un diferencia di opinion grandi aki, cu no ya yuda trece e partido bek hunto.

Pa colmo, un grupo den partido no ta contento mas cu Gerlien Croes, cu a durf di expresa su mes den partijraad contra e idea pa wanta Benny Sevinger como un politica condena penalmente como parlamentario y politico activo. Wyatt tambe hunto cu Do Santos a vota contra. Santos a hay’e ta bandona partido y bira independiente mientras tabata teme cu Gerlien Croes y Mervin Wyatt lo a haci mesun cos. Pero esey no a sosode, mientrastanto, Gerlien Croes a tene un conferencia di prensa pa bisa cu e tin cu papia cu su votadonan pa e dicidi riba su futuro politico den AVP. Wel, awe su coleganan a yega mainta, duna discurso y bay cas atardi, lagando nan dos atras den boca di leon. Cu esey e grupo di “Old Boys Club” a mand’e un mensahe cla y raspa!

Tocante Gerlien Croes

Gerlien Luzdiane Croes a nace na Spijkenisse, Rotterdam, Hulanda dia 7 di februari 1987, loke ta nifica cu e tin 36 aña. Na 2007 el a finalisa su studio VWO y na 2013 a gradua na Universidad di Maastricht Hulanda como hurista den ley internacional y ley Europeo y e ta posee e titulo di Meester in de Rechten. El a traha 2 aña den sector priva na Hulanda den e industria di gas y petroleo y na 2015 a bolbe Aruba cu su famia. Desde 2016 Gerlien ta fungi como Consehero di Maneho na Oficina di Relacionnan den Reino y Union Europeo. 

Na 2017 Gerlien a haci su entrada den politica como candidato di Partido AVP y ricibi sosten di 982 votador, mientras cu na eleccion di 25 di juni 2021 el a crece te cu 1919 voto individual y asina bira e di dos votegetter di su partido. Pa di dos eleccion consecutivo, Gerlien ta posiciona su mes como di tres hende muhe cu mas hopi voto na Aruba.

Tocante Mervin Wyatt

Melvin Glorinda Wyatt-Ras, miho conoci como Mervin, ta bin di famia di tres yiu Ras-Bareño y ta casa. E ta un orthopedagogo, terapista di Hypnosis Rational y terapista di famia y di sistema. Pa diesdos aña el a traha den Departamento pa Asuntonan Social, seccion Dificultad di Bida y Famia. E tin 20 aña di trayectoria den Parlamento di Aruba y e ta e prome Presidente di Parlamento femenino, den e periodo di aña 2005 pa 2009 y di 2016 pa 2017. Entre 2010 y 2013 el a figura como parlamentario independiente despues di a bandona fila di partido MEP y prome cu a ingresa den partido AVP. Mervin a haya 735 voto den eleccion di 2001 cu MEP, sigui pa 529 voto den eleccion di 2005, mientras cu na 2009 a subi te cu 708 voto pero bolbe subi te 834 den eleccion na 2013 cu AVP. Den eleccion di aña 2017 el a bolbe bay atras na 661 voto y den e ultimo eleccion (2021) el a baha te na 580 voto.