For di un generacion p’e otro: Show cultural otro siman

Proximamente Grupo Nucleo lo tene un show cultural entre adultonan mayor y hobennan, na Cas di Cultura.

Ta bay tin diesdos grupo cu lo duna actuacion, canto, arte, baile y poesia. E publico lo disfruta di un variacion di diferente tipo di canto, arte y baile di e gruponan social 60+. E show aki lo tuma luga dia 19 di october 2022, cu lo cuminsa pa 6:00pm pa 9:00pm.

Rudy Leysner, coordinador di Grupo Nucleo a sigui bisa cu e actividad aki a cuminsa ocho aña pasa y esaki ta di seis biaha cu ta organisa e actividad aki. Door di e pandemia di COVID-19, pa dos aña nan no tabata por a organis’e, pero e aña aki nan t’ey bek den ful swing, caminda cu ya e preparativonan a cuminsa pa asina deleita e publico.

E gruponan ta gusta e actividad aki, unda cu cada biaha nan ta bin diferente creatividad. Nan creatividad ta enorme, unda cu nos adultonan mayor tin hopi idea y conocemento. Esaki nan lo demostra tambe den nan show.

Siguientemente e gruponan:

·         Grupo Lely di Brazil

·         Grupo Tiki Tin di Noord

·         Grupo Honey Bees di Santa Cruz

·         Rosea Cultural

·         Grupo di Damas Pegasaya

·         Fio Wester y su folclore

·         Grupo Happy Hearts

·         Titi Tromp y su grupo

·         Grupo Curason Jong

·         Grupo Flor di Aloe

·         Grupo Bubali 60+

·         Curason di Savaneta.

Esakinan ta tur e gruponan cu ta pertenece na Grupo Nucleo, cual lo ta participando den e show cultural entre e adultonan mayor y e hobennan.

Comunidad di Aruba ta keda cordialmente invita pa bin presencia e show cultural aki cu Grupo Nucleo, den Cas di Cultura, dia 19 di october proximo.

Ban apoya nos cultura! Pasobra cultura… ta nos.