Willemstad, 29 desèmber 2022
For di ora ku bo ta purba di paga mi ku un chèk sin fondo, bo ta hopi robes!
Partido Inovashon Nashonal (PIN) a tuma nota ku hopi preokupashon di un komunikado di prensa ku a kaba di sali awe 29 di desèmber 2022 di parti di Refineria di Kòrsou (RDK) relashoná ku e negosashonnan pa yega na eksplotashon di nos refineria. Ta hopi straño ku RDK ta purba defendé algu fraudulento i robes!
PIN ta úrgi Staten pa yama un reunion públiko ku úrgensia pa atendé ku e posibel presentashon di dokumentunan falsifiká den e proseso di negosashon entre RDK i Caribbean Pertoleum Refinery (CPR) ku e meta pa trese klaridat riba por lo mínimo e sigiente preguntanan:
1) RDK òf Gobièrnu komo akshonista, doño di RDK, a duna keho na ministerio públiko pa nan hasi investigashon riba e dokumentonan probablemente falsifiká? I si no a duna keho, ta riba kiko ta warda pa hasi esei?
- Kon ta posibel ku RDK ta aseptá ku CPR ta presentá un invershonista ku ta falsifiká hustamente e papelnan ku lo mester a sirbí pa proba ku nan tin sèn?
- RdK ta negoshando ku CPR òf tin negosashon paralelo ku invershonistanan individual?
- Kon bin ainda RdK ta na mesa ku un instansia ku ta organisá presentashon di dokumentu falsu, lokual ta un krimen serio?
- Dikón ora ku RdK a presentá ku CPR dos (2) komisario di RdK a tuma nan retiro?
Na opinion di PIN no por warda niun tiki mas ku e reunion tokante e presentashon di dokumentonan falsu den un proceso, ku pa kolmo ta kardinal pa futuro di Kòrsou.
