Fiscal van der Biezen: Sea cauteloso cu e “poder” pa evita condena prome cu tempo

Dia 16 di september ultimo a tuma luga den un ambiente formal, e instalacion di hues mr. T.A.M. Tijhuis, mr. W.C.E. Winfield y mr. J.A. van Voorthuizen y e re-instalacion di e huesnan Arubiano mr. A.J. Martijn y mr. U.I.D Luydens, como miembro di Corte Comun na Aruba den presencia di gobernador di Aruba S.E. Alfonso Boekhoudt como tambe diferente mandatario, miembro di e orden di abogado, diferente autoridad militar, consular y civil y personal di Corte Comun y Ministerio Publico.

Den reemplaso di Procurador General a hiba palabra e hoben fiscal mr. Patrick van der Biezen, kende a expresa su satisfaccion y a felicita e huesnan Tijhuis, Winfield y Van Voorthuizen pa nan instalacion. Encuanto e huesnan Martijn y Luydens, como miembro di corte ya instala den pasado, a re-instala pero como miembro di corte traslada permanentemente pa Aruba fo’i Corsou. E ultimo ta haci cu e sesion extraordinario di Corte Comun tabata specialmente festivo.

“Aruba a gana no un, sino dos hues Arubiano. Señora Martijn y señora Luydens, bonbini bek na cas y masha pabien,” ta loke cu v/d Biezen a expresa. Den su discurso el a indica cu un sesion di instalacion of di presentacion ta un ocasion festivo pa y ta normal cu Procurador General ta bisa algo riba un tema di interes pa Ministerio Publico.

Mescos cu presidente di Corte Comun, loke no ta completamente casual, v/d Biezen a enfoca algo riba prensa y medio di comunicacion. Fuera di e poder legislativo, ehecutivo y hudicial di e Trias Politica di Montesquieu, ta considera prensa como e di cuater poder. Corte Europeo di Derecho Humano a cualifica hopi biaha prensa di “guardian publico”. 

“No tin duda cu prensa ta desempeña un papel crucial den nos sociedad democratico. Su funcion ta pa señala e mal socialnan. Ademas di esey, e trabao di prensa ta di garantisa cu sociedad ta ricibi informacion confiabel. E papel di e canal di comunicacion ta otorga asina na prensa un funcion poderoso di ciere (sluitingsfuncie).”

Fiscal mr. Patrick van der Biezen a sigui bisa den su discurso: “Ministerio Publico ta hopi consciente di e rol importante cu prensa tin. Door di divulga e iregularidadnan, prensa ta haci un contribucion importante na un sociedad sigur y husto. Ministerio Publico, hunto cu polis y otro organismo di investigacion, tambe tin e responsabilidad di contribui di forma eficaz na un sociedad sigur y husto. Pa ta n’e altura, nos intervencionnan mester ta visibel, perceptibel y reconocibel p’e victimanan, e delincuentenan y tur otro. Ministerio Publico, polis y otro organismo di investigacion mester ta habri den nan consideracionnan al respecto. E principio basico di Ministerio Publico, polis y otro organismo di investigacion ta cu nos ta proporciona informacion specifico activamente na sociedad. Al fin y al cabo, sociedad tin derecho na un informacion exacto y oportuno riba e trabao di Ministerio Publico en general y riba e evolucion di e investigacionnan concreto (di investigacion) y e casonan penal en particular. Ministerio Publico ta publica regularmente riba Facebook of riba nan webpage e investigacionnan cu nos ta ehecutando. Tambe nos ta uza e canalnan aki pa informa publico si a detene sospechoso of a realisa registro den e contexto di e investigacionnan aki.”

Pa un relato mas amplio, lesa TREMPAN.