FFK TA ORGANISÁ E PROMÉ EDISHON DI ‘GIRLS MEET SOCCER 2022’
DJADUMINGU, 16 DI ÒKTOBER DEN STADION RIGNAAL ‘JEAN’ FRANCISCA!
Ku sumo plaser FFK ta organisá e promé edishon di ‘Girls meet Soccer 2022’. E aktividat aki lo tuma lugá djadumingu 16 òktober próksimo den Stadion Rignaal ‘Jean’ Francisca di 4’or di atardi pa 8’or di anochi. Riba e dia aki FFK lo organisá un torneo di ‘warm-up’ pa e ekiponan femenino di kategoria U-15 i durante e evento aki FFK ta duna oportunidat na tur mucha muhé di 10 aña bai ariba pa sera konosí ku e deporte futbòl i mas ku klaro propagandá e deporte aki bou di mucha muhé mirando ku tin un persepshon ku esaki ta pa mucha hòmber so.
Durante e pousanan di e torneo di ‘warm-up’ tur e demas damanan ta haña un klínika chikí di futbòl i ta haña e oportunidat pa praktiká ku bala p’asina sera konosí mas ku e deporte aki. Tur e klupnan di futbòl femenino tambe lo tei presente pa duna informashon i inskribí si ta deseá di forma parti di un ekipo.
E meta di e evento aki ta pa hasi futbòl mas atraktivo i hisa e interes serka nos damanan pa despues nan djòin un ekipo femenino i yuda engrandesé futbòl femenino aki na Kòrsou. FFK den su afan pa esaki ta trahando duru den kolaborashon ku FIFA pa futbòl femenino tambe ta rekonosí mundialmente. P’esei durante di e delaster tempu aki FFK ta hasiendo su máksimo esfuerso pa logra e meta aki i den kuadro di esei a bini ku e idea pa organisá e promé edishon di; ‘Girsl Meet Soccer 2022’.
Pues FFK ta spera di tin un atardi bai kue anochi eksitoso kaminda nos damanan por konosé mas di futbòl, disidí di forma parti di un ekipo i kompetí den nos Kampionato Femenino pa den futuro nos tin damanan ku ta praktiká futbòl riba nivel internashonal òf ku lo forma parti di nos selekshonnan lokal pa saka kara di nos dushi isla.
Un invitashon ta bai na tur dama pa asistí na e promé edishon di ‘Girls Meet Soccer 2022’.
FFK i Komishon Femenino ta warda bo, kòrda ku e evento aki ta grátis!
12 òktober 2022
