Fenomeno di phishing a lanta cabes

Recientemente tin varios persona a haya un e-mail for di un adres ([email protected]). Esey ta loke e entidad Banco di Caribe mes a indica riba un publicacion haci riba Facebook, y ta indica cu den e e-mail aki, ta puntra e cliente pa renoba su password of pa cumpra un One-time Passcode.

E banco na su turno a adverti cu nunca nan ta manda un e-mail pidiendo un password nobo ni tampoco pa cumpra un One-Time Passcode.

Si en caso e cliente ricibi tal e-mail, nunca mester click riba cualkier link di e mensahe aki, ni suministra informacion personal pidi, pero pa tuma contacto cu Customer Support Service inmediatamente pa reporta e incidente aki.

Fuera di esey tabatin mas banco cu a sufri di e fenomeno aki, tambe yama skimming, caminda cu e cliente ta bira victima di ID theft (hortamento di identidad) y hasta Credit Card Fraud, caminda cu e cliente ta haci un transaccion cu su credit card den exterior y pa su mala suerte un ‘hacker’ cu tur su malicia, sa di podera di su ID of cuenta y ta uza esaki, treciendo gasto p’e cliente.

KICO TA PHISHING

E pregunta awo ta keda kico ta phishing. Tin hende no conoce e termino aki y hasta ta confundi cu e palabra fishing (piscamento). Phishing ta un tipo di ingenieria social caminda cu un hacker ta manda un mensahe fraudulento (por ehempel falsifica of engañoso) diseña pa gaña un persona p’e revela informacion sensibel n’e atacante of pa desplega un software malicioso den e infrastructura di e victima, manera ransomware. E atakenan di phishing a bira mas y mas sofistica y hopi biaha, ta refleha di forma transparente rib’e site y ta traspasa cualkier frontera di siguridad adicional cu e victima.

ORIGEN DI E TERMINO

E termino Phishing ta bin di e palabra Ingles ‘fishing’ (piscamento), creando e ilusion di uza un has y spera cu e victimanan ‘morde e has’. E hasnan uza por ta hopi varia.

Tambe ta bisa cu e termino phishing t’e contraccion di password harvesting fishing (cosecha y pesca di password), aunke esaki probablemente ta un acronimo retroactivo, mirando cu e structura ph ta comunmente uza pa hackers pa substitui e f, como base di e forma bieu di hackmento di telefon conoci como phreaking.

Pa un relato mas amplio, lesa TREMPAN.