Faridi Werleman-Daou corona como Sra. Carnaval di TOB Carnaval Group 

Despues di dos aña sin por a celebra Carnaval, e gruponan a probecha di e tempo aki pa nan a prepara di trempan pa e celebracion di Carnaval 69.

Asina tambe Touch Of Brazil (TOB) a organisa nan prome evento pa e proximo temporada di Carnaval, door di corona nan Sra. T.O.B. 2023, den persona di Faridi Werleman-Daou. Lissette Chung, lider di grupo TOB p’e ultimo binti añanan a indica cu e evento di coronacion a bay den un super bon ambiente. Chung a bisa cu nan a haya hopi peticion pa por representa TOB den e eleccion di Sra. Carnaval 2023, pero Faridi tabata esun cu mas a resalta. 

Pero nan a scoge pa Faridi, cu ta un persona hopi alegre, conoci, hopi extrovertido y e ta ful entusiasma. Ora cu Lisette a puntra Faridi kico e ta pensa pa representa TOB den e eleccion di Sra. Carnaval, despues di a consulta cu su famia y amistadnan, el a bay di acuerdo. Segun e lider di grupo TOB, nan Sra. Carnaval 2023, Faridi Werleman-Daou ta practicamente cla cu su preparacionnan. Por bisa cu si e evento tabata mañan, Faridi lo tabata cla pa representa TOB. Mas aleu, Chung a bisa cu henter e team di TOB hunto cu henter e famia di Faridi, tanto na Aruba, Boneiro y Corsou ta cla p’e reto aki y sigur lo ta all out cu Faridi. 

CONCEPTO NOBO

Lider di TOB, Lisette Chung a bisa cu SMAC, pa medio di su presidente, Darren van Ommeren, a bisa lo bin c’un concepto nobo den eleccion hunto cu e Comision di Eleccion di Reina, pa cual e lo ta algo ful diferente. 

Loke Chung a bisa cu Faridi Werleman-Daou ta un persona cu ta gusta baila y lo no kier ta riba carosa. Pero esaki ta detayenan cu ainda lo mester delibera ariba dje, segun Chung a bisa. 

CORONACION

E acto di coronacion a tuma luga na Sandra’s Garden y e integrantenan di Groove Master’s, cual lo ta e banda cu lo compaña TOB, pa cuminsa na fakkel y e demas paradanan. Mervin Baptiste tabata esun encarga di pasa e sjerf y Ashrock Gario tabata tin e honor di e corona Faridi Werleman-Daou, como Sra. Carnaval 2023 pa e grupo Touch Of Brazil (TOB) 2023.