Famia ta denuncia: Funcionario di Guarda Nos Costa ta viola derecho humano

Un persona ilegal cu ta deteni den Guarda Nos Costa a manda un video denunciando e abuso cu nan ta pasa den. Meta di e video ey ta pa tur persona gubernamental encarga haya sa kico nan ta pasando aden.

E video aki tabata graba diaranson y den dje nan ta pidi si por yuda nan, pasobra ta violando e derechonan humano. Esunnan deteni na Huis van Bewaring na Dakota tabata kier a saca afo e inhusticia humano cu nan ta biba.

Tambe nan kier a duna sosten n’e articulo cu a sali den un media, informando cu tur loke a sali ta berdad. A bay riba e echo cu cuater funcionario a agredi Michael Chavez di Venezuela y casi el a perde conocemento.

Tambe e situacion cu tabatin un candela di cual dos ciudadano Venezolano tabata isola pa nuebe dia den un trailer. E detenido a bisa esaki ta berdad, pasobra nan no por a baña ni laba djente, incluso no tabatin un corchon pa drumi. Door di control medico a saca nan fo’i isolacion, pasobra nan tabata deshidrata.

Ochenta porciento di e detenidonan tin mas di dos luna eynan, priva di libertad y simplemente pasobra nan no tin papel. Gobierno di Aruba no tin placa pa manda nan tur hende.

Entre e detenidonan tin caso na DIMAS, bringando pa nan firma liber. Incluso tin hende cu a biba henter nan bida na Aruba, a studia. Persona cu ta bringando pa mas di cinco permiso y asina mes tin nan priva di nan libertad.

Ta pidi gobierno pa resolve e casonan di miho manera. “Si gobierno no tin placa pa paga su mesun trahadonan, e ora no mester tuma un medida”, el a expresa. Tambe pa laga nan bay bou un garantia y asina ey nan por resolve na un manera pa por bay nan pais. Nan a traha e video diaranson, pasobra nan no sa kico lo pasa cu nan.