Famia Planea a expande pa cumpli cu aumento di demanda pa informacion y producto

Diahuebs ultimo Famia Planea Aruba (FPA) a comparti cu prensa e momento den cual a realisa apertura oficial di nan espacionan nobo. E sede ubica riba Vondellaan, awo ta conta cu mas luga pa atende cliente y organisa evento, asina Evelyn Ras-Yarzagaray, director di FPA a duna di conoce.

E organisacion ya caba tabata den proceso di digitalisacion for di 2019 ora cu yegada di pandemia a cambia tur cos. Entre otro, mester a pusha e dunamento di servicio online, pero tambe FPA a conoce un aumento abrupto y drastico den e demanda pa informacion y producto.

Na momento cu a sur pasa e 10 mil cliente pa aña, a realisa cu tabata momento pa haci cambio. Sinembargo, den ultimo tres aña, FPA a conoce un aumento di 50% y ya caba ta coriendo den e 15 mil client; esey ta sin conta cu ta traha directamente cu scolnan. Esey hunto cu protocol di siguridad, a haci cu e luga a bira chikito.

Ras-Yarzagaray ta conta cu nan no por laga hende warda largo pafo ora di bin busca anticonceptivo,  mientras cu kier acomodo e cantidad mas grandi persona cu ta busca consulta mas profundo, mayornan cu ta bin hunto cu nan yiu pa busca conseho, etc. Awo FPA tin un luga mas grandi, caminda por ta sede pa workshop y sesion di informacion pa grupo di te cu 20 persona. Ya caba ta pensando riba algun segmento cu por invita.

Famia Planea Aruba a caba di cumpli 52 aña. Varios dokter di cas, encabesa pa dokter Zaandam a bin cu e movemento internacional di salud sexual na 1970. Awendia Famia Planea tin presencia na 144 otro pais. Su obhetivo original tabata acceso na metodo anticonceptivo, pero den transcurso di tempo a wak demanda pa informacion crece. Den decada 90 educacion a tuma over cu enfasis riba educacion sexual integral.

Na comienso hopi scol na Aruba a pone gran resistencia pa, entre otro, motibo religioso. No tabata duna espacio pa informa y educa e mucha y hoben encuanto nan curpa, sexualidad y emocion cu ta aspectonan cu no ta haya na scol. Eventualmente FPA a cuminsa traha cu AZV, stagiaire y proyecto. Enfoke ta riba educa e muchanan riba pubertad, hygiena y nan desaroyo for di mucha pa hoben y te adulto.

“E parti di tecnologia y social media ta loke a bin mas nobo, durante aña 2000. Hunto cu ne sexting y manda potret y video di tono sexual pa otro,” asina e director a splica. Esaki ta motibo pa cual mester keda analisa y adapta na cada generacion pa por sirbi nan di e miho manera. Aworaki mes, FPA ta preparando pa bay den un transicion pa servicionan digital. Esey ta e manera cu e hobennan ta nabega mundo y FPA a ripara cu e necesidad ta hopi grandi pa educacion sexual y anticonceptivo. Esaki ta bay man den man cu scol y dokter di cas.

Hopi cos a cambia den ultimo 70 aña y no por papia cu sex ta un taboo mas; sigur no pa e mucha y hobennan, segun Ras-Yarzagaray. E palabra t’ey ainda, pero e ta relata mas na un cierto generacion y creencia, mientras cu mucha y hoben ta hopi receptivo y ta pidi pa informacion, educacion y producto.

Aña 2022 a bay hopi bon caminda a enfoca riba e expansion y na mei a bira un partner oficial di e International Planned Parenthood Federation; na e punto cu e organisacion local a keda reconoci internacionalmente na november. Aunke tabata miembro caba desde 1970, mester a pasa door diferente stap pa bira un associate member oficial. Pa 2023 ta lansa un servicio nobo caminda ta digitalisa receta pa evita papeleo, haci e proceso mas facil y lihe di obtene e productonan anticonceptivo cu e cliente mester. Adicionalmente, FPA ta bay introduci dos producto nobo cataloga como longer active reversible contraceptive, cual mundialmente ta hopi gusta. Un ta un spiraal hormonal y e otro ta un implante hormonal. Manera semper, ta preparando pa activa den temporada di Carnaval den prevencion di embaraso hubenil y no desea cu nan campaña di distribuimento di condom.