FADA: Dokter di cas y psicologo ta miho informa pa atende cu Salud Mental

Fundacion Anti Droga Aruba (FADA) a tene un encuentro informativo pa asina presenta e verwijsbeleid nobo di Geestelijke Gezonheidzorg (GGZ). A conta cu presencia di dokter di cas como psicologo.

Rubiella Toppenberg, trahado preventivo di FADA, a splica cu e stuurgroep nobo di GGZ a lansa un verwijsbeleid, cu ta e manera con e proceso di door verwijs ta bay tuma luga. Na momento un persona cu ta sinti un desbalanse cu su salud mental, e prome caminda cu e tin di acudi ta su dokter di cas. Na momento cu e yega na su dokter di cas, e lo bay mira kico ta e malestar.

Na momento cu e ripara di no por trata esaki, e ta haci uzo dje verwijsbeleid. E verwijsbeleid ta indic’e na unda y na ken e por manda e pashent pa asina e por haya e tratamento cu e mester.

Esunnan cu a forma parti dje panel tabata DAS cu ta e parti dje seccion di bida y famia, Tienda di Educacion, Stichting Hunto, FADA y hunto cu DVG. Cada un tabatin e tarea di conta kico tur ta parti di nan trabou como tarea den e verwijsbeleid aki.

Toppenberg a indica cu no ta di sconde pero na Aruba tin un crisis pa loke ta salud mental. Tin hopi problema, enfermedad di salud mental. Hopi persona tin miedo pa busca ayudo. E ta kere cu esaki pa esunnan cu ta den e veld social ta hopi orguyo pasobra nan tin un verwijsbeleid unda cu awo por compronde miho ki momento y na unda precies tin di manda un pashent.