Exposicion di arte Primary Colors na Biblioteca Nacional

Diaranson atardi tabatin e apertura di un exposicion nobo di arte na Biblioteca Nacional Aruba su sede na Oranjestad. Ta trata di Primary Colors: Blue, Yellow & Red, un coleccion di obra den diferente medio traha pa varios artista local.

Paul Wong ta un di e 14 artista cu ta participa. Su specialidad ta airbrush y el a traha un obra di wayamaya y otro di un yuwana geel. A pesar di ta ocupa den e temporada aki, Wong a haya toch chens di haci e cuadranan aki siman pasa.

Janine Flanegin ta otro artista cu a aporta na e exposicion aki. El a bin cu un structura traha cu un baki cu el a wak cant’i caminda y el a bisa cu un dia el a traha algo cu ne. E ta conta cu e obheto a lag’e pensa riba e manera con “nos ta pone nos mes den un prison di bisa cu no ta bay logra algo.” Un anochi el a lanta cu e idea pa bin cu diferente forma den dje cu tin un nificacion personal.

Wong ta invita tur hende pa bin wak e diferente style di arte. Manera e tema ta bisa, ta traha cu e colornan primario, blauw, geel cu ya ta den exhibicion y lo keda pa e proximo tres siman. E ultimo color, esta cora, ta programa pa habri dia 12 di october. “E ta bon pa bin bishite, bo ta wak e diferente media, con nan ta pinta y disfruta di arte,” asina e artista a comenta.

Pa un relato mas amplio, lesa TREMPAN.