Exposicion Beyond Words ta habri pa publico

Bou di auspicio di FARPA a tuma luga e EXPO Beyond Words y mester conclui cu e obranan di artista Stanley ’Stanga” Heinze, ta di un nivel halto. 

E obranan ta sumamente bunita y henter e evento tabata exitoso. E 34 obranan ta cologa den e tres salanan di UNOCA y tambe tin un proyeccion di imagen masha bunita den un di e salanan. Tabatin basta persona presente n’e preview aki, admirando e trabou di ‘Stanga’. E obranan ta papia pa nan mes y tur hende ta liber pa interpreta e mensahe di e obranan con nan ta compronde e trabou. Esey no ta kita cu ‘Stanga” ta dispuesto pa duna splicacion di kico a inspir’e pa crea e obra. 

Apertura oficial di e exposicion aki lo tuma luga diasabra, dia 15 di oktober pa 8:00 pm, pero e exposicion aki lo keda pa un luna na UNOCA p’asina henter pueblo di Aruba por bishit’e. 

UN PROYECTO INNOVATIVO

Stanley tin hopi aña caba ta traha rib’e proyecto aki, cu ta uno completamente innovativo. E proyecto ta trata tur su experiencianan den bida, cual el a pone den forma digital, pa presenta na pueblo, kico y con el a pasa den tur esaki. Un exposicion moderno pa e pueblo. 

Stanga, cual ta e nomber artistico di Stanley Heinze a cuminsa na bisa cu e exposicion aki ta un expresion di locual el a haci henter su bida, unda cu a papia di maneho, plan, cuadro. Y awor cu e ta pensionado, el a scoge pa hacie den imagen. E ta hacie den imagen, unda cu na luga di uza diferente filtro y cuadronan, manera cu ta wak otro, e ta hacie di alma pa alma. E ta haci esaki via imagennan, unda cu e artista ta comunica cu e esun cu ta wak e imagen. Y esun cu ta wak e, por crea su propio interpretacion P’esey e exposicion  yama ‘Beyond Words’.

Heinze for di jong caba tabata interesa den arte, for di jong e tabata bezig cu teatro y musica. Despues el a forma un carera profesional, y ora el a baha cu pension, el a dicidi di tuma espacio pa e crea. El a haya resultado positivo di e resultado, cual a dun’e forsa p’e sigui. E proyecto ta 100% di Heinze, e ta traha cu potret y esaki e ta manipula digitalmente. Intencion ta pa presenta e proyecto aki na e hobennan. Esaki ta un caminda hopi habri cu e hobennan tambe por haci uzo di dje. Heinze mes lo purba di desaroya esaki c’un imagen, pa e imagen papia pa su mes, di alma pa alma. Manera cu e proyecto mes ta bisa, e ta un ‘Expo Beyond Words”.

No perde e oportunidad aki di tira un bista riba un exposicion sumamente interesante y bunita y alabes topa cu e autor p’asina haya un splicacion detaya di su obranan di arte digital.