Explosion den cas: Señora di edad herida y transporta pa hospital

Un situacion basta serio a tuma luga na Pos Chikito na momento cu un explosion a herida un persona di edad.

Esaki a tuma luga aproximadamente 5:00pm den Betonicastraat ora a bati alarma pa un stoof cu a rementa y causa no solamente daño pero a herida un señora di edad cu tabatin mester di asistencia medico mesora.

E situacion tabata uno di seriedad como cu tabata trata di gas y explosion. E combinacion ey ta algo cu bo no kier pa surgi den bo cas. Den un caso asina bo no sa kico lo por ta e causa di e escape di gas pero sigur algo di maximo urgencia cu mester keda resolvi inmediatamente.

Tanto polis como brandweer a mobilisa rapidamente na e sitio y a traha rapidamente pa domina e situacion. A pidi presencia tambe di slachtofferhulp cu a bin atende cu e habitantenan afecta.

Sigur un situacion di susto y lamentabel caminda un persona di edad a resulta herida. Un rato despues a transporta e victima pa hospital pa tratamento medico.