Ex-polis Jossy Tromp a fayece awe mainta na hospital

E tabatin algun tempo malo caba y tabata interna den hospital. Pa algun aña, Ignacio Jose Tromp, miho conoci den pueblo como “Jossy” tin reto di salud. E ta un diabetico. Sinembargo, awe mainta e curason a faya na hospital y e no a logra sobrevivi esey. Jossy Tromp a fayece y a bay laga atras su dos yiu muhenan Josrin y Tatiana, mas tres nieta.

Jossy Tromp ta naci dia 1 di februari 1943 y a fayece awe dia 27 di october 2022, cu 79 aña di edad. El a bira polis desde dia 30 di mei 1969, net riba dia di tur e disturbionan na Corsou. Fecha ki dia el a baha cu pensioen, no ta conoci, pero e tin basta aña si cu e no ta activo mas. Su ultimo rango tabata di Sub Inspector di Cuerpo Policial Aruba y tabata traha na Warda di Polis di Oranjestad.

Jossy Tromp a bira polis den e mesun klas di varios otro cara conoci den comunidad policial. Ta un klas forma pa Elio Dania, Rufino Solognier, Pedro Valentijn, Anthony Emerenciana, Roland Bikker, Barcelino Martina, Fico, Offerman, Ronald Thode, Leo Ras, Ronny Bernadina (ex-Korpschef), Cedric Bronswinkel, Roy Henriquez y Jesus “Chepito” Kelly. Tres colega a fayece caba, cu ta Gregorio van der Biezen, John Thijsen y Henky Alberg.

Despues di a huramenta como polis na Corsou, a manda Jossy traha na Sint Maarten. El a traha na mayoria isla’riba y despues a regresa Corsou atrobe pa algun aña. Den su carera el a yega di traha hasta na Hulanda, mientras cu na Aruba el a sirbi den varios departamento. E tabata conoci tambe como un polis motorisa, pasobra por a topa cu ne na varios ocasion riba motorcycle di polis.

Den deporte Jossy Tromp tabata masha conoci como un fanatico fiel di e ekipo di Racing Club Aruba (RCA), na Solito. A fungi hopi aña como referee di Volleyball y ta por lo menos un di e promotornan cu a cuminsa cu beach volleyball na Aruba, hopi aña pasa.

Separa di su mesun amor pa deporte, den su tempo liber, su hobby semper tabata pa hunto cu su rumannan, organisa Hersengymnastiek, o sea Seso Sport, pa varios organisacion of compania. Asina tabata organisa e tipo di eventonan asina den cual ta test e conocemento di e participantenan riba luganan di Aruba, historia y custumbernan di nos hendenan.

Jossy Tromp tabata biba te na ultimo den Maria Christinastraat riba Klip. E ta un fiel oyente tur media di Enfoke. Headlines Group, e cas editorial di 24ora.com y Trempan ta expresa palabra di mas profundo condolencia na su rumannan, yiunan, nietanan, amigonan y conocinan. Cu Jossy sosega na paz.