Esun cu ta cana cu Cristo Hesus lo no dwaal

Hesus a bisa: “Ami ta e caminda y e berdad y e bida,ni un hende no ta bini cerca e Tata si no pa medio di Mi.” E enemigo ta pone hopi hende dwaal, y nan ta kere cu nan ta riba e caminda corecto, pero nan a wordo engaña sin cu nan sa, pasobra nan kier kier haci dos cos, sirbi Cristo y entretene e mundo.

Mescla tur clase di amistad den otro, drenta yugo desigual, purba complace cu tur hende, bira activo den cosnan cu no ta di Dios, y keto bay ta pretende cu Dios ta na prome luga. Amistad cu mundo ta enemistad cu Dios, Pasobra e mente fiha riba e carni ta morto, ma e mente fiha riba e Spirito ta bida y pas.No ta existi un evangelio moderno, pasobra e palabra di Dios no ta cambia, e ta e presencia di Dios.

Percura pa boso mes y pa henter e tou, mey mey di cual Spirito Santo a pone boso como wardado, pa pastoria e iglesia di Dios, cual E cumpra cu su propio sanger.( Hechonan 20;28).

Esun cu haci hustonan dwaal bay den mal caminda,lo cay den su mes buraco, ma e perfectonan lo hereda un bon herencia ( Proverbionan 28:10)

Awendia nos mester ta atento cu nos yiunan, pasobra e mundo aki tin su agentenan cu ta cana ta dwaal hubentud, y hopi di nan ta persona elite, influenciador, casi intocabel, y nan no sa cu e diabel ta uza nan.

Menciona nomber di Dios solamente no ta suficiente, importante ta biba pa Señor. Si un persona ta bezig cu Dios y tambe e ta bezig cu idolatria e persona aki a dwaal.

Cristo Hesus ta tur cos pa nos, pasobra ta solamente Hesus a muri na cruz pa nos, E a paga pa nos picanan, e libra nos di bay fierno, awel ta solamente na Cristo Hesus nos mester dirigi tur alabansa y den Su nomber tur oracion mester wordo dirigi, na Tata Todopoderoso, pa nos haya yudansa.

No ta tur momento un profeta falso ta un religioso, pasobra e diabel ta cana rond manera leon buscando ken devora, pero e ta un hende cu tin e capacidad diabolico, pa aleha un hende for di caminda di Dios, cu placa , poder, y hopi mentira, e por laba cerebro di un hende y uza e persona su ambicion pa hacie bira un esclavo di dje, presenta aliansa falso, amistad putri y asina domina e persona.

E cosnan aki mi ta skirbi boso tocante di esun cu ta trata di gaña boso. Yiunan chikito no laga ni un hende gaña boso,esun cu ta practica husticia ta husto mescos cu E ta husto. Esun cu ta practica pica ta di diabel, pasobra diabel a haci pica for di principio.Y e yiu di Dios a parece pa e proposito aki , pa E destrui e obranan di e diabel.(1 Juan 2:26 +1 Juan 3:7 -9).

Dios ta yama nos pa trece tur esnan cu a dwaal,y coy caminda robes, bek riba e caminda di Dios.

Nos mester ranca nan saca for di man di e enemigo, pa asina nan por wordo libra for di e mundo di scuridad. 

No ta den droga y alcohol solamente hende por dwaal, pero  tambe den tur clase di inmoralidad, den cosnan cu ta parce alegre y bunita, pero tras di nan nos ta bezig destruyendo otro y nos mes.

Dios ta yamando su pueblo. Sinceremente, Pastor Marcel Balootje