Eric Ras (CURPA): Mientras pueblo ta sufri Gobierno ta sigui hiba un bida di luho y fiesta

Gobierno atrobe no a logra pasa e prueba pa locual ta pasa e presupuesto 2023. Gobierno a traha un presupuesto di fantasia y no por motiva for di unda a saca e cifranan. Nos por a tende un minister bisa cu no tin placa pa Arubus mucho menos pa malgasta. Nos por tende tambe cu tin 15 bus cu ta para un paar di aña caba sin uzo. Asina nos por sigui menciona. E gobierno aki mes a hinca su mes den un caya sin salida. 

Despues di 5 aña den gobierno nan no culpa pasado pasobra ta nan mes a scoge e caminda aki. Un partido cu a priminti shelo riba tera, pero locual cu nan a realisa ta miseria pa nos pueblo. Un partido cu a logra drenta gobierno no pa su programa di campaña sino pa troce berdad y a hiba un campaña di mentira. Gañamento tambe ta pica. Satanas ta e tata di mentira. Mientras pueblo ta sufri nan ta sigui hiba un bida di luho y fiesta. Si nos mira e paisnan comunista esaki ta locual nos ta bibando awe den 2022.  

Ora nos tende e palabra “defund the polis” nos por  saca nos conclusion. Esaki ta e modus operandi di e paisnan comunista. Economisa riba siguridad ta trece siguridad di nos pueblo na peliger. Nos por a tende cu CAFT ta pone enfasis pa baha gasto riba overtime. Si den e ultimo 10 añanan como 5 biaha no a zorg pa tin opleiding pa polis, ta con lo bo kier baha overtime. Esaki no ta solamente nos cuerpo policial pasobra tin mas departamento no a haya sanger nobo den e departamentonan. Awe nos por mira cu servicio a bay atras. Nos por corda tempo cu a stop e opleidingnan pa maestro di scol.  Aparentemente nos no ta siña di nos foutnan. 

E luna aki ta crucial pa e gabinete aki paso e conseho di CAFT ta pa duna ministerraad di Aruba su regalo esta su KB. Un gobierno cu ta pone cara di henter pueblo di Aruba na berguensa door di no sa con pa goberna nos isla. Riba dje kier pa Hulanda exonera su debe pero ta firma protocol for di 2018 y te dia di awe no ta cumpli. E dianan nos dilanti nos lo mira si Hulanda lo duna gobierno su regalo of nan lo busca cualkier excuus pa benta gobierno abao. No ta un secreto cu interno nan tin hopi problema. Nan por busca moda di tapa solo cu un dede pero e realidad ta conoci.

Nos di partido Curpa ta mira cu si bin un eleccion dentro di 3 luna despues di caida di gobierno lo bay tin un cambio grandi. Nos por mira cu despues di ultimo eleccion pueblo no a vota mas pa partidonan grandi. Na aña 2013 7038 votador no a vota pa partido grandi, na 2017 el a subi na 12.928 y na 2021 el a bolbe subi na 19.575. Nos por a mira tambe cu union di partidonan no a duna resultado desea. E union riba lista di partido POR a demostra na 2017 con nan a bay atras considerabelmente den voto. Nos ta kere cu den e proximo eleccion votadornan lo no scoge pa partidonan grandi. Nos ta premira cu mas di 26 mil votador si no ta mas lo no vota pa partidonan grandi. 

Aruba ta un isla chiquito lo no mester di over na e systema electronico pa vota. A keda demostra cu e sistema electronico ta facil pa hack. Venezuela ta conoci pa e sistema aki con coriente ta bay y ora e bin bek e resultado di eleccion ta wordo cambia. Mesun cos a pasa na Merca cu di anochi pa mainta e resultado a cambia. A detene e CEO di Konnech, Eugene Yu, pa via di fraude den eleccion. Alaska a dicidi cu lo no uza computer mas pa votamento sino e lo bay manual. E ultimo cu nos a mira sosode ta na Brazil caminda den 15 minuut cu coriente a bai e partido comunista a subi cu 2 miyon voto. Nos isla lo prospera ora cu caba cu inhusticia. Esaki lo pasa ora e husto cu tin temor di Dios ta goberna. 

Lider di partido Curpa

Eric Ras