Eric Ras (CURPA): Gobierno kier implementa Agenda 2030 cu ta bin pa horta y destrui

Eric Ras (CURPA): Gobierno kier implementa Agenda 2030 cu ta bin pa horta y destrui

Gobierno di Aruba ta sigui pusha e Sustainable Development Goals Agenda 2030. Nos minister di economia ta encarga cu e agenda aki y ta sigui pusha pa implementacion. E diesshete puntonan den e agenda aki ta nada otro pa yega na un gobierno mundial. Esaki no ta nan tempo.

Esaki ta e puntonan di contenido di agenda 2030

• PUNTO UNO: POBRESA

E intencion ta pa bo no tin nada mas y e tiki cu bo tin lo bo perde.

• PUNTO DOS: CERO HAMBER

E meta ta pa kita tereno di esunnan cu ta planta y ta cria bestia. Hulanda ta un ehempel cla di esaki. E gobierno Hulandes ta multa e agricultornan y cria di bestia si nan no entrega nan tereno na gobierno. E agricultor- y criadonan di bestia a duna gobierno Hulandes un ultimatum caminda dia 30 di November 2022 nan lo cuminsa cu protesta pisa den tur provincia na Hulanda. Ohala esaki ta e fin di gabinete Rutte.

• PUNTO TRES: SALUD Y BIENESTAR

Aki na Aruba ta manda e trahadonan di hospital cas cu pakete pa baha gasto. Nos por a mira caba cu cuido a bay atras y cu salud di hende no ta importante. Esunnan cu mester di cuido no ta haya atencion paso kier trata bida di hende manera un negoshi.

• PUNTO CUATER: EDUCACION DI CALIDAD

Kier introduci enseñansa di genero na scol y asina confundi nos mucha nan. Nan lo siña cu no lo tin mama y papa mas. Aumento di schoolgeld pa 400 florin.

• PUNTO CINCO: IGUALDAD DI GENERO

E punto aki ta unda mester introduci e transgenderwet y e mayornan lo perde autoridad riba nan yuinan. Mucha por bai censo y bisa cu nan no ta mucha homber mas sino mucha muhe. Esaki ta pa caba cu e famia institui pa Dios. Gobierno lo kita autoridadnan di mayor y nan por bay asina leu di haci operacion pa cambia nan genero. Esun cu laga corta su toteki afo lo tin cu biba pa resto di su bida cu e consecuencianan di esaki. Esaki ta obra di satanas.

• PUNTO SEIS: AWA LIMPI Y SANEAMENTO

E nacionnan grandi ta dump nan desperdicio den lama y awor kier sali na defensa di mundo.

• PUNTO SHETE: ENERGIA LIMPI Y PAGABEL

Aki ta papia di solar panel y molina di biento, etc. E molinanan no ta reciclabel y na otro pais ta deranan y mester di grease cu no ta natural. Nos ta lubida cu partido MEP a bay contra di e proyecto di Urirama y a bin tur sorto di argumento y awe kier push’e den pueblo di San Nicolaas.

• PUNTO OCHO: TRABOU DECENTE Y CRECEMENTO ECONOMICO

Den cinco aña di gobernacion gobierno no a bin cu ningun proyecto, al contrario cu tur e medidanan ta mas hende a perde trabou

• PUNTO NUEBE:  INDUSTRIA, INNOVACION Y INFRASTRUCTURA

No a haci nada rib’e tereno aki. A core haci campaña cu yen di promesa y nada mas. E  Sustainable Development Goals agenda 2030 ta contra pa tin un refineria.

• PUNTO DIES. REDUCCION DI DESIGUALDAD

Aki ta unda pueblo lo no tin nada y lo mester ta feliz. Esaki ta locual cu e World Economic Forum ta propaganda. Un otro plan diabolico y comunista.

• PUNTO DIESUN: CIUDAD Y COMUNIDAD SOSTENIBEL

Esaki kiermeen cu gobierno lo dicidi tur cos pa bo. Lo bo no tin libertad.

• PUNTO DIESDOS: PRODUCCION Y CONSUMO RESPONSABEL

Gobierno lo dicidi con hopi y kico lo bo por come. Carni sintetico y frutanan sin simia paso lo bo no por planta nada mas.

• PUNTO DIESTRES: CAMBIO CLIMATICO

Caba cu tur refineria. Tur auto mester ta electronico. Pa produci un bacteria pa auto bo mester di 250 kilo di materia. E prijs di un bateria ta 30 mil dollar y no ta reciclabel loke ta mas malo pa medio ambiente. Mayoria hende lo no ta bay tin auto mas.

• PUNTO DIESCUATER: BIDA MARINO

Otro pretexto cu bo no por come pisca mas paso nan ta den extincion y mester cuida e bida bou di awa.

• PUNTO DIESCINCO: ECOSISTEMA TERRESTRE

Esaki ta e bosnan. Hulanda mes no ta tene cuenta cu bos paso nan a caba cu masha hopi mata y kier culpa otro pais. Otro engaño mas.

• PUNTO DIESSEIS: PAZ, HUSTICIA Y INSTITUCIONNAN

Esaki ta paz ficticio y unabes cu corumpi e institucion di husticia pueblo lo perde su derechonan. Esaki ta locual cu a pasa den paisnan comunista. Paz no lo existi si ta bay contra leynan di Dios.

• PUNTO DIESSHETE: ALIANSA PA LOGRA E METANAN

Final di libertad y introduccion di gobierno mundial.

Un berdadero Cristian bo ta conoce pa su frutanan. Agenda 2030 ta bin pa horta, mata y destrui. No solamente caba cu e famia institui pa Dios sino kier baha e poblacion mundial. Un bon Cristian nunca por ta di acuerdo cu agenda aki y contra leynan di Dios.

E Parlamentarionan cu ta defende gobierno y interes di pueblo no ta conta. E casonan di Ibis y Aveztruz ta dilanti huez caba locual mester haci ta bin cu investigacion pa e casonan di fase y loonsubidie, Eagle LNG cu no conoce e contenido di e contract, molina di biento, Tourism Enhancement Fund, Crisis Team y Arubahuis. Un parlamentario cu principio lo pidi pa investigacion y no ta vota pa sconde cosnan cu ta contra ley.

Partido Curpa ta e unico partido cu ta para pa leynan di Dios y ta para pa e famia cu Dios a crea. Nos lucha pa crea un fundeshi solido pa bienestar di nos Aruba.