ENTREGA DI RELATO ANUAL DI KOMISHON PA ENSEÑANSA SPESHAL

 WILLEMSTAD – Resientemente Minister di Enseñansa, Siensia, Kultura i Deporte (ESKD), sr. Sithree van Heydoorn, a risibí e promé relato anual di presidente di Komishon instituí den un dekreto gobernamental ku ta referí na enseñansa speshal. E relato ta un kompilashon i un análisis di dato tokante karakterístikanan di e alumnonan ku a keda referí pa Enseñansa speshal entrante komienso di aña eskolar 2022-2023.

Tareanan di e komishon ta stipulá den un dekreto ministerial, fechá 3 di sèptèmber 2021. Entrega di un relato anual na Minister di ESKD i Direktor Sektor di Enseñansa i Siensia, tambe ta un tarea di e komishon, manera ta stipulá den e dekreto Ministerial.

E komishon ta kumpli ku e trabou importante di hasi un evaluashon independiente i imparsial di tur e dokumentonan di e alumno, pa asina evitá ku un alumno por yega den enseñansa speshal sin ku esaki ta realmente nesesario. E komishon ta studia e dokumentonan di alumno pa asina evaluá e grado di nesesidatnan ortopedagógiko i ortodidáktiko. Ta studia kada dokumento individualmente dor di evaluá efektividat di yudansa ku e alumno a risibí, e profil didáktiko riba tur ocho área edukashonal i tambe e desaroyo sosial emoshonal di e alumno. Esaki ta un aserkamentu holístiko, den kua tur aspekto di desaroyo ta keda evaluá. Tambe ta posibel pa e komishon bolbe evaluá den kaso ku e alumno keda referí pa enseñansa speshal pa un periodo di prueba, lokual por enserá ku e alumno por regresá enseñansa regular di fundeshi òf keda referí na un otro tipo di enseñansa speshal.

Den kuadro di lei di protekshon di privasidat mayor(nan) òf tutor(nan) di e alumno mester duna outorisashon na tur informashon di e alumno ku keda atkerí via di skol. Si dado kaso e komishon no risibí outorisashon atraves di firma di mayor(nan)/ tutor(nan) e fail di e alumno ta bai bèk e skol ku e alumno ta bishitá. Tur miembro di komishon ta mará na deber di sekresia, hasta ora nan no ta forma parti mas di e komishon.

Ademas e relato anual ta finalisá ku tres konseho na Minister di ESKD, ku por ta útil pa ehekushon di maneho di e Ministerio. Kada relato anual lo sirbi di forma eksponensial komo instrumento pa atkerí dato riba karakterístikanan di e alumnonan ku ta mihó sirbí den enseñansa speshal. Ademas mas kompletu e datonan keda kompilá dor di Ministerio di ESKD, mas mihó por argumentá desishonnan den kuadro di uso di fondonan di impuesto na bienestar di alumnonan den nos sistema di enseñansa.

—

KOMUNIKASHON

** Riba e potrèt athunto por tuma nota di e entrega na Minister sr. Sithree van Heydoorn