Elizangela Croes: Autismo no ta un defecto

Autismo ta un trastorno, un incapacidad den desaroyo causa pa diferencia den e celebro. Pa e motibo aki ta uza e termino neurodiversidad. Nan ta nabega e proceso cognitivo y emocional na un manera diferente. Bou di e termino aki tambe ta bin: dyslexia, dyscalculie, dyspraxia, AD(H)D, entre otro. No por bisa cu tin cura di autismo, un persona cu autismo ta ricibi ayudo pa compronde kico ta autismo y con p’e por maneha esaki, cu yama psycho-educacion, ta loke cu Elizangela Croes a comenta.

Kico bo sa di autismo?

Elizangela ta conta: “Mi sa un tiki di cada cos. Mi ta gusta pa mi haci mi investigacion pa mi sa di loke e ta trata. Asina tambe e conocemento pa sa con pa trata cu un alumno cu ta riba e spectrum di autismo a keda crece.

Den enseñansa regular bo ta haya alumno cu tin un of otro problema den siñamento. Ora cu mi a ripara cu algun di e problema cu e mucha tin no tin nada di haber cu nan capacidad di inteligencia, pero mas bien e ta un problema den nan habilidad/ concentracion/ desaroyo general, mi a cuminsa busca pa sa mas.

Con scol por yuda un alumno cu autismo?

Inclusion. E ta tuma hopi pasenshi di e maestro para dilanti klas, cu tin 25-30 alumno, sin un assistent of profesional presente na scol, pa por yuda un alumno cu autismo. Tin alumno cu autismo cu a sigui nan enseñansa regular.

Conocemento. Sa y si bo no sa, busca pa sa, kico y con pa trata cu un alumno cu autismo. No ta tur alumno ta mesun cos, niun alumno riba e spectrum ta mesun cos.

Prepara. Bo lesnan mester ta adapta, bo mester por diferencia, duna nan tempo pa procesa, no ta e manual ta importante.

Conscientisa. Duna les di habilidad social, no solamente pa e alumno cu autismo, pero pa e klas completo.

Calidad. Calidad di enseñansa, curso di capacitacion pa tur cu ta den enseñansa (maestro, cabesante, assistent, logopedista, trahado social, trahado di limpiesa etc.).