Elias Croes rumbo Hulanda p’e crece mas den futbol

Elias Croes ta un hoben futbolista cu a milita den e team di SV Santa Fe for den e division U-17 y awo a haya e oportunidad pa bay Hulanda, p’e por sigui cu su carera futbolistico. El a indica cu na Aruba no tin futuro p’e por avansa cu e deporte aki. E kier bay otro pais p’e por sigui bay dilanti cu e sport cu e gusta.

Awo cu e ta na Hulanda, e lo warda pa haya un team eynan y tambe pa por sigui cu su scol eynan.

Un mensahe cu Elias ta laga atras p’e hobennan ta cu si haya chens pa bay afo, no duda.

Sergio Acevedo, coach di e seleccion U-15 y awor aki di U-17 di Santa Fe, como tambe assistent di coach U-20 y Hoofdklas, a splica cu Elias ta un bon mucha y ta haci su trabao bon como keeper. A traha basta duro cu Elias y a haci su best semper. Elias ta concentra semper pa bay y para bon pa no laga ningun bala pasa den wega.

Coach Acevedo por ultimo a menciona cu a bisa Elias cu e mester madura como persona, y despues ta bin e parti deportivo. E mester haya mas responsabilidad, mester haya mas compromiso, mas actitud y sigur cu si e haci esey, e lo bay padilanti. Sigur cu Elias lo haci falta den e team y ta spera cu e continua den e bon caminda, el a bisa finalmente.