El a muri den accidente maritimo na Aruba: Famia di Cassidy Murray ta pidi pa mas siguridad

A pasa 13 luna desde cu un hoben fo’i Milton, Massachusetts, a fayece den un accidente maritimo durante vakantie cu su famia na Aruba. Awo, e mayornan di Cassidy Murray ta poniendo presion pa tin mas norma di siguridad den lama na Aruba cu e speransa pa proteha otro famia di nan dolor.

Den un articulo publica riba e website di WCVB 5 di Boston, ta indica cu David y Linda Murray ta pertenece na un club cu ningun mayor ta desea pa ta. Nan ta haciendo nan mayor intento p’e isla mehora e condicionnan di siguridad den nabegacion.

“Nos no ta compronde pakico no por haci cambio gradual,” Linda Murray a bisa.

Cassiday tabata ‘tubbing’ cu su tata ora cu ambos a cay. No tabatin ningun ‘spotter’ rib’e boto. Cassidy a dal contra e chapaleta di e boto, ora cu esaki a bolbe pa recoge.

“No tin nada pio cu perde un yiu,” David Murray a bisa.

Awo e representante Steve Lynch ta trahando cu e autoridadnan di Aruba pa mehora e siguridad di e deportenan acuatico. Algun di e medidanan aki di siguridad p’e deportenan acuatico lo inclui formacion pa tripulacion di e botonan, spotters riba e botonan, protector p’e chapaletanan y un ‘turn-off switch’ riba e motornan.

Si Aruba no bin cu algun plan pa mehora e siguridad den awa, Lynch ta dispuesto pa golpia Aruba unda cu mas ta duel nan: su economia.

“Si e situacion no resolve manera cu famia Murray kier, e ora nos lo mester pidi, ami lo mester pidi e Departamento di Estado, pa emiti un advertencia di biahe,” Lynch a bisa.

“Mi no kier pa transmiti e mensahe pa no bay Aruba. Nos kier pa Aruba siña di esey,” Linda Murray a bisa.

Emiti un advertencia di biahe (travel advisory) lo t’e ultimo recurso cu e Departamento di Estado lo tuma, pero Lynch ta spera di a yama atencion di gobierno di Aruba cu e storia di Cassidy.