Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 14 di novèmber 2022
Tópiko: Petishon pa dirigí pregunta na Minister di desaroyo Sosial, Labor i Bienestar
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di desaroyo Sosial, Labor i Bienestar, señora Ruthmilda Larmonie-Cicilia.
Danki pa e koperashon.
Atentamente,
David Seferina
Parlamentario pa
frakshon di MFK
Minister di desaroyo Sosial, Labor i Bienestar
Señora Ruthmilda Larmonie-Cicilia
PRESENTE
Kòrsou, 14 di novèmber 2022
Tópiko: Efektividat di e supsidionan duna na e instansianan
Apresiabel señora Minister,
Miembro di Parlamento pa Frakshon di MFK, David Seferina ta sumamente preokupá pa loke ta trata e forma di duna supsidio na fundashonnan
Dia 20 di òktober último Parlamento a risibí e rapòrt di Kontrolaria General “ARC” titulá ”Rapport Financiële positie van de gesubsidieerde instellingen 2016 – 2020 (vervolgonderzoek)” den kual a para ketu na e posishon finansiero di e instansianan ku a risibí supsidio di gobièrnu di un manera struktural durante di e periodo di 2016 pa 2020.
Suskrito a tuma nota ku e énfasis tabata riba efektividat di e supsidionan ku ta duna na e diferente instansianan. Pa ta eksakto a para ketu na e echo ku e último añanan(periodo 2016-2020) a saka un montante di Naf. 800 mion na supsidio pa e instansianan aki. Lokual ta remarkabel ta ku bastante di e instansianan no ta den un posishon finansiero saludabel. Fundashon Tayer Sosial Sta. Martha spesifikamente ta un di nan.
No opstante tur e problemanan rondó di e fundashon aki, gobièrnu a presupuesta un suma di Naf 2.8 mion den e “Ontwerp Landsverordening tot vastelling van de begroting van Curaçao voor het dienstjaar 2023”. Banda di esaki, e fundashon a risibí e konosido “San Antoni” tambe.
E pregunta ku ta surgi serka suskrito, ta kiko e efektividat di e supsidionan na e fundashonnan aki ta. Pues suskrito kier sa si e supsidio ta bai realmente na e servisio ku e respektivo fundashon ta duna òf na gastunan di “overhead”.
Pa e motibunan ariba menshoná i hasiendo uso di artíkulo 96 di Reglamentu di órden di Parlamento di Kòrsou, suskrito kier a hasi Minister di SOAW, Ruthmilda Larmonie-Cicilia e siguiente preguntanan;
- Minister por splika parlamento ku Fundashon Tayer Sosial Sta. Martha ta operashonal ainda?
- Si ta si. Kiko e fundashon ta hasiendo na e momentonan aki? Ku ta nò, ta fayit e fundashon a bai? I for di ki dia e fundashon no ta operando?
- Apesar ku e fundashon no ta operando, ta berdat ku nan ta risibí supsidio di kasi 2.8 mion florin pa aña?
- Minister por splika Parlamento ku ta berdat ku Fundashon Tayer Sosial Sta. Martha a risibí e famoso San Antoni ?
- Kuantu kliente fundashon Tayer Sosial Sta. Marta tabata brinda servisio?
- Si e fundashon no ta operando mas kiko a hasi ku e klientenan?
- Ki maneho minister lo bai hiba pa e fundashonnan ku ta risibí supsidio i no ta entregá kuenta nan anual?
- Ki maneho minister lo bai hiba pa e fundashonnan ku nan posishon di likides no ta sano òf ta empeorá?
- Minister por duna Parlamento e raportahenan preskribí ku e instansianan mester presentá tokante e efektividat di e supsidionan?
- Minister por informá Parlamento tokante e státus di e kuadro di maneho di supsidio a base di kual Ministerio di desaroyo Sosial, Labor i bienestar ta otrogá supsidio?
Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento.
Atentamente,
David Seferina
Parlamentario pa
frakshon di MFK
