Edward Maduro (SADA) riba overtime halto: Gobierno a hiba un maneho iresponsabel

Den rueda di prensa di dialuna, sindicato SADA a expresa nan preocupacion riba e maneho di overtime cu gobierno a introduci siman pasa. E forma con a bin cu e maneho aki no ta uno corecto, pero mas iresponsabel.

Presidente di SADA, Edward Maduro, a informa cu mester compronde ta cu nan no ta eynan pa bringa y ta pro overtime, pero na momento di traha overtime nan tin un deber pa cumpli cu ne. Tin ora e diensten executieve tin un minimal ocupacion (bezetting) cu nan mester cumpli cu ne, p’esey tin biaha nan mester traha overtime. E kier pa ta cla cu nan no t’ey pa bringa pa ta pro overtime, pero nan ta reacciona riba e maneho di gobierno. Door di e maneho iresponsabel di gobierno, ta conduci cu overtime ta riba un nivel bastante halto.

INTRODUCCION IRESPONSABEL

Motibo cu SADA ta haya cu e maneho dje introduccion ta uno iresponsabel. Esaki ta pasobra dia 14 di september gobierno a firma e maneho di overtime, unda cu e dia siguiente, esta 15 di september, a informa e diensten a haya e maneho aki den nan poder y cu el a drenta na vigor riba e dia ey. Consecuentemente pa merdia e departamentonan a haya sa dje maneho aki. Aki por mira con iresponsabel gobierno ta anda cu tipo di cos asina aki.

HUNGA CU SENTIMENTO Por mira duidelijk con gobierno ta purba di hunga cu sentimento di e trahadonan of esunnan cu ta lesa e maneho. Aki gobierno a indica cu como a duna e 5% bek den salario, y awo pa via di esey ta bin cu maneho iresponsabel pa loke ta trata overtime. E ambtenaarnan a haya e 5% di nan salario, pero gobierno mes a indica cu e ta presupuesta caba e aña aki 18 miyon.