Edmundo Marlin: Minister Ursell Arends tin cu stop di bruha tera riba dump di Parkietenbos

Minister Ursell Arends a haci cierto insinuacion contra sindicato SEPPA. Loke el a bisa no ta berdad, pasobra sindicato SEPPA no a papia di empleo di trahado. Tur cos a bin na momento cu e sindicato a expresa nan preocupacion riba e funcion y tarea nobo dje trahadonan di Parkietenbos entrante prome di januari 2023 cu nan mester haya.

Edmundo Marlin, secretario di organisacion di SEPPA, a splica cu nan ta buscando informacion dje tareanan di e trahadonan di Parkietenbos mester tin. Fo’i momento cu e mandatario a dicidi di cera dump, pa SEPPA esey no ta un discusion. E sindicato a puntra e mandatario cu a tuma decision cu no tin trafico drentando Parkietenbos, kico lo ta e tarea dje trahadonan aki. A pidi e mandatario pa prepara esaki desde trempan pa asina e trahadonan por prepara pa januari 2023.

E sindicalista a splica di a manda carta p’e director di Serlimar, pasobra ta preocupa p’e situacion dje trahadonan. Marlin a lesa e carta di kico nan a pone den e carta.

Den oficina di mediador di gobierno a haci pregunta na e director di Serlimar kico ta bay haci cu e trahadonan, kico ta nan funcion. Pero e director no por a duna un contesta riba esaki. Unico cos cu el a bisa cu no tin claridad ainda. Mediador na su turno a recori na minister pa haya sa kico ta bira e tareanan dje trahadonan aki desde dia prome di januari 2023.

Dos biaha a puntra e director di Serlimar riba e funcion nobo p’e trahadonan, pero e director no por a duna un contesta. P’esey loke e mandatario a bisa no ta beland cerca SEPPA. E sindicato ta busca pa sa kico ta e tareo of funcionnan nobo dje trahadonan. Esaki ta algo cu ta buscando desde augustus.