Edificio pa Fundacion Hunto birando realidad

A cuminsa traha riba e edificio di Stichting Hunto y diahuebs a tene e spantebier na momento cu a yega e punta halto di esaki. E edificio aki ta pa salud mental y ta añadi balor pa Aruba.

Pa Aruba mes e ta cardinal pa salud mental pasobra e ta bay tin un departamento apart pa mucha. Randall van Trigt, vice-presidente di Fundacion Hunto, a splica cu esaki ta un problematica grandi na Aruba y ta bay tin un team completo specialisa pa atende cu salud mental pa mucha y adulto. Pa Stichting Hunto e edificio aki ta significa hopi mas cu simplemente un edificio. E ta calidad di Stichting Hunto, e progreso cu nan a haci den e ultimo tres aña. Un fundacion cu practicamente ta existi 70 aña, pero den e ultimo tres aña a cuminsa mira cambio grandi.

A tarda nan pa yega unda nan ta awe, sacrificio grandi dje ultimo tres añanan di e trahadonan pero cu partner strategico nan ta logra un meta grandi. Van Trigt a menciona e partnernan manera Cornerstone Economics cu a pone vision dje fundacion riba papel, un gobierno como partner pa financiamento. E fundacion riba su mes cu a sacrifica y a duna hopi di su banda pa inverti den e edificio aki. E ta un edificio cu ta bay brinda hopi yudansa na salud mental den su totalidad.

Nan ta mira e problematica como uno serio, depresion ta un problema serio. Tambe e fundacion a ripara cu esey ta algo cu mester. E fundacion tambe a haci cambio grandi, pasobra tin un fundacion cu tambe a incorpora adiccion di salud mental hunto. Esey ta algo reconoci internacionalmente y awo na Aruba hinc’e.

Minister-president mr. Evelyn Wever-Croes, a indica cu cuater luna pasa a pone e prome piedra dje structura, awo por mira un sturctura y construccion hopi avansa. El a gradici tur esunnan cu ta haciendo nan maximo esfuerso pa esaki bira un exito. Tambe tur profesional riba e area di salud mental y adiccion cu ta haciendo nan maximo esfuerso pa yuda e grupo di personanan aki. Tambe el a papia riba e guia y liderzgo di minister Rocco Tjon pa por a yega unda nan ta awo.

Salud mental ta un problema hopi serio den comunidad. Segun e mandatario, saliendo dje pandemia ya nan tabata sa cu esey tabata e siguiente crisis nacional. El a sigui splica cu nan a elev’e na nivel di crisis, p’esey como lider di crisis general di Aruba e ta contento di mira cu a tuma esaki na serio y a haci trabou riba dje. E profesionalnan ta sinti cu ta duna atencion n’e veld, tambe awo nan tin mas animo pa traha na esaki y e ta contento di mira esey. E problema ta serio y grandi ainda specialmente den dianan di fiesta.

Minister di Husticia y Asuntonan Social, Rocco Tjon, a expresa cu a yega e punto di mas halto halto. Tambe e ta kere cu esaki pa loke ta trata e cuido di saludo mental y adiccion ta un paso hopi importante. Segun e mandatario, na mei e edificio aki lo ta cla y asina ey por tin un edificio nobo caminda por brinda mas cuido na tur cu mester di esaki.

Hendrik Tevreden, parlamentario di MEP, a felicita minister Tjon p’e trabou fuerte cu e ta haciendo riba e tereno di droga y adiccion, pero particularmente riba salud mental. El a sigui indica cu e tempo dilanti e por bira miho. E parlamentario sa cu a pasa tempo dificil durante pandemia, unda hopi hende a sufri y lucha bou e enfermedadnan di problema mental, esunnan den adiccion, pero pocopoco ta crea infrastructura y ta drecha e maneho p’asina ey tur por haya e ayudo necesario cu nan mester.