Edgard Vrolijk: Union den Parlamento ta importante ora tin reto

Diamars mainta a tuma luga e aña parlamentario 2022-2023. Gobernador di Aruba, Su Excelencia Alfonso Boekhoudt a habri e apertura cu su discurso riba e trabou di gobierno, pero tambe a papia un tiki riba parlamento.

Presidente di Parlamento, mr. Edgard Vrolijk tabata anhela pa scucha cierto cos den e discurso di gobernador, pero esey no tabata e caso. Loke si e gobernador a bay riba dje un tiki tabata riba parlamento. Aki e gobernador a indica cu parlamento por eleva y haci e trabou un tiki mas eficiente. Gobernador a papia mas riba e trabou di gobierno y durante e discurso el a enfoca mas riba union.

Vrolijk ta kere cu union ta e parti mas importante, pasobra n’e momentonan aki tin yen reto. Den union y kitando tur bista partidario, mester ta mas obhetivo pa asina ey hunto por salba Aruba un biaha mas. Y asina ey saca Aruba den e bon caminda. E ta haya cu esey tabata e mensahe cu mas a resalta, mirando cu den su concepto esey a cay mas den su agrado di scucha.

Pa loke ta e economisch herstel, cual situacion actual cu Aruba financieramente ta den dje, el a indica cu den reino Hulanda ta bezig cu esey. Vrolijk a indica cu cada bes ta confronta cu CFT. Pero na momento cu kier desvia y kier bay den un herstel asina CFT ta bisa no, pasobra financieramente ta mara, practicamente ta bay den failliet y naturalmente ta haya conseho negativo. P’esey e ta kere cu na mesa mester sigui dialoga riba esey. Aruba ta recuperando, pero no a yega ainda manera tabata na 2019. “Si 2019 mes tabata dificil, corda ora bo a perde trabou na 2020, 2021 y por ta awo bo a haya trabou. Kiermen e recuperacion ta largo ainda”, el a indica.

Esey ta algo cu nan mester evalua. Presidente di Parlamento ta kere cu na final di dia mester ta positivo y, sigur reforma y reconstrui Aruba pa asina ey e futuro generacion cu ta bin dilanti por tin un futuro. Si no reforma y reconstrui awo Aruba, e generacion no tin futuro.

RENOBACION DEN PARLAMENTO

Vrolijk a yega di menciona cu ta bin algun cambio den parlamento, di cual el a indica cu nan a cuminsa na cambia e bentananan. Nan ta cambiando e resto di bentananan, cual ta sigui e aña cu ta bin. Tambe nan ta wardando riba DOW, pasobra esey ta algo cu tin nan pega pa e reconstruccion dje parti patras. E edificio parti patras ta hopi kibra. E intencion ta pa eynan reconstrui pa den futuro, pasobra por mira cu tin mas partido politico, y si sigui cu e mesun trend ey no tin luga pa tur hende. Tin mester amplia un espacio pa duna conferencia, algo mas modernisa y alcaso pa locual ta parlamento. Esey ta e metanan.

Segun Vrolijk, nan ta bay ful trot pa loke ta e verzelfstandiging (privatisacion). Den e luna aki na IPKO nan lo sigui amplia riba esey. Tambe den e griffier overleg cu ta sigui na october, esey ta un di e puntonan principal cu nan tin.