Recientemente Parlamento di Aruba a tuma algun trahado nobo pa traha directamente cu e organo mas halto di nos pais. A tuma como cuater persona na trabou, despues di a tuma nan den funcion, tabatin masha critica riba e candidatonan. Un grupo, a comenta cu mayoria di e personanan cu a tuma, ta hopi yega n’e politiconan activo den parlamento of e partidonan den coalicion.
Por lo menos un di esunnan cu a tuma na trabou, ta ruman di parlamentario y lider di fraccion RAIZ, Misha Raymond. Apart cu a tuma su ruman homber pa traha cu e fraccion awo a tuma e ruman muhe pa traha den Parlamento di Aruba.
A acerca Presidente di Parlamento, mr. Edgard Vrolijk (MEP) p’asina e comenta riba e tumamento di hende den parlamento, mas ainda pa comenta riba e proceso.
Segun e Presidente di Parlamento, ta for di algun aña caba parlamento tabatin mester di hende pa traha. Pero for di 2016, tabatin un stop pa tumamento di hende. A logra ricibi aprobacion pa tuma seis hende. Vrolijk a comenta cu parlamento tin su ‘formatieplan’ for di 2012 caba, caminda ta indica cu parlamento tin mester di 30 hende pa traha, caminda awo apenas tin 14 den servicio. A manda e plan pa Departamento di Recurso Humano (DRH) p’asina revisa e plan.
Despues di ricibi aprobacion pa tuma seis hende, e presidente di parlamento a bay den CHA pa ricibi opinion. CHA a opina cu nan kier tin influencia den e proceso di seleccion aki. Ta riba 15 di juli ultimo cu e ruman di Misha Raymond a cuminsa traha na parlamento.
Un di e rekisitonan di trabou, ta indica claramente cu pa por traha den Staten, e persona mester ta ‘politiek neutral’, awo claro, un ruman di un parlamentario activo, no por ta neutral. Segun Vrolijk, ta auto so tin neutral, no hende. Awendia y vooral na Aruba, tur hende conoce otro y ta dificil pa bisa cu un hende ta politicamente neutral of no.
Comment