Edgard na Miguel: “Bo ta un miyonario cu ta bin pa come so den parlamento”

“E circo ta keda mesun cos, t’e payasonan ta cambia” ta un dicho di difunto comediante, Vale Croes. Ora analisa e reunion cu a tuma luga dialuna, ta pone bo asta cuminsa kere cu e dicho ey ta berdad. Croes e tempo ey a compara parlamento cu un circo. Durante e reunion cu tin como punto di agenda: costo di bida, a desvia y termina ken ta bin trabou pa come, ken ta miyonario of no. Ta na momento cu Edgard Vrolijk di MEP a pidi un punto di ordo, vociferando su malcontento riba e echo cu Mike Eman a haya ta bon di bandona reunion mientras e mes t’esun cu a pidie. Segun Vrolijk, el a ricibi un foto di Mike ta canando bay su cas mientras nan ta paden ta traha.

No a dura mucho cu Miguel Mansur di Accion 21 tambe a pidi un punto di ordo. Mansur a vocifera cu e tambe ta sintie zjangurna cu no ta tur miembro di parlamento ta den sala, pero cu si e ta bibando un frustracion cu; no ta importa ken t’ey of no, pasobra na final e stempel parlement, costiendo di partido MEP y RAIZ ta aproba tur cos di gobierno toch. Vrolijk a contest’e mesora tambe. Vrolijk ta sinti cu Mansur ta brasa e mal ehempel di Eman. El a bay asina leu di ofende Mansur di ta un miyonario y cu ta lastra tur trahado di parlamento y unico cos cu e ta haci ta bin trabou pa come. Mansur ta sinti cu e vice-presidente di parlamento no tin cu duna atencion na tipo di punto di ordo partidista asina. Vrolijk na momento cu el a termina cu su punto di ordo, el a ordena e vice-presidente, esta Raymond Kamperveen pa cera e reunion.