Economista Suzette Dumfries ta bek pa yuda su pais

Suzette Dumfries ta un economista cu a traha den hopi proyecto di desaroyo economico rond mundo y na dado momento, despues di a refleha masha hopi mes, el a bin bek su pais y wak kico e mes por haci pa su mesun hendenan.

Un di e cosnan cu el a siña den tur e proyectonan cu el a traha rond mundo ta cu un pais no por desaroya si su hendenan no ta den un posicion di progresa hunto cu ne. Pero ningun hende no por progresa si nan no ta participa den e proceso ey nan mes.

Desaroyo economico tin dos banda. E banda caminda cu tin un gobierno responsabel y un parti caminda cu e hendenan tin e responsabilidad y crea rikesa pa nan mes. Esey ta loke cu Dumfries kier enfoca riba dje.

El a conta cu e kier haci esaki door di conecta cu e hendenan na Aruba cu ta interesa den e ciencia di con bo ta crea rikesa. No solamente cre’e, pero tambe sosten’e y preserv’e. Cu kier sa tur dimension di locual rikesa ta. E psicologia di rikesa, e practica di rikesa y e principionan di rikesa. Es decir, con pa inverti, den kico inverti, con pa proteha locual bo ta crece, con pa multiplica bo placa. Esey t’e parti unda cu nan por ta empodera, p’asina tuma decision cu lo crea un resultado economico diferente pa nan.

PAIS TA CRECE PERO E PUEBLO TA KEDA ATRAS

Aruba ta un pais cu ta extremadamente desaroya. Pero si refleha bon, por bisa cu e desaroyo di Aruba no necesariamente a nifica cu henter e comunidad rond a progresa hunto cu ne.

Esey parcialmente ta responsabilidad individual. E ora ey pa empodera hende, kico pa haci pa crea rikesa a base di desaroyo di Aruba, esey t’e interes di Dumfries actual.

Dicon hende rico ta bira rico, y keda rico y dicon hende pober ta keda pober. Dumfries kier duna e hermentnan pa nan compronde con placa ta traha y con  nan por laga placa traha pa nan. Pero un cos ta importante. Rikesa no ta placa so.

Cu informacion cu realmente por cambia e participante su bida, cu un comprondemento hopi grandi kico placa ta, con e ta traha y con e ta traha pa bo y cu e comprondemento cu no mester di placa pa traha placa.

Su deseo ta pa contribui na un Aruba cu sa miho, cu por miho y cu ta miho. Esey ta su prome paso p’esey.

MENSAHE FINAL

Dumfries ta firme den pensamento cu ningun pais por desaroya si su hendenan no progresa hunto cu ne. Ningun hende por progresa si nan no participa conscientemente den e proceso ey. Dumfries ta invita pueblo di Aruba pa bin y dicidi cu nan merece mas.