Willemstad, 06 febrüari 2023- Minister di Desaroyo Ekonómiko, sr. Ruisandro Cijntje i pais Kòrsou ta sumamente honrá di por ta anfitrion di e promé reunion di miembronan di Caribbean Tourism Organization (CTO) ku ta pa Ministernan i Direktornan di ofisina di turismo di diferente paisnan den Karibe. Esaki lo tuma lugá di 8 pa 10 di febrüari próksimo.
CTO ta un organisashon regional kaminda aktualmente 32 pais den Karibe ta miembro i ta paga un miembresia konforme e kantidat di turistanan di estadia ku nan ta risibi pa aña. E organisashon ta duna tur tipo di asistensia na e paisnan den forma di ekspertisio tékniko, merkadeo, desaroyo di rekurso humano, planifikashon i ehekushon di evento i investigashon i data. E vishon di CTO ta pa posishoná e área di Karibe komo e destinashon di turismo mas atraktivo i deseabel durante henter aña i su propósito ta pa liderá desaroyo di turismo duradero den Karibe. CTO ta para pa “One Sea, One Voice, One Caribbean”.
CTO a keda lansá ofisialmente na 1989 aki na Kòrsou. Señor Ruben Page, nos diputado di turismo, a fungi komo e promé presidente di CTO. CTO a establesé despues ku e organisashon Caribbean Tourism Association (fundá na 1951) i e organisashon Caribbean Tourism Research and Development Center (fundá na 1974) a uni. Kòrsou a forma parti di e organisashon for di komienso te ku aworaki. Pues ta na su lugá ku awe den tempunan kaminda turismo ta demostrá di ta e pilar ekonómiko mas grandi ku ta sòru pa kresementu ekonómiko den kasi tur e paisnan den Karibe, e promé reunion di e Ministernan i Direktornan di ofisina di turismo den 2023 ta tuma lugá na nos “Dushi Kòrsou”.
Nos Ofisina di Turismo (CTB) konhunto ku Ministerio di Desaroyo Ekonómiko (MEO) a prepará un binida kaluroso pa e delegashon grandi di CTO i tambe un programa ku banda di e deliberashonnan di trabou lo kontené tambe momentunan ameno kaminda e delegashon por konosé i eksperenshá mas di Kòrsou, di nos produkto turístiko i spesialmente di nos ambiente di Karnaval. Minister Cijntje ta konvensí ku despues di esaki nan tur lo bolbe bèk pa eksperenshá muchu mas.
