E obra “Entre Aruba y Hulanda mi a haya Paraiso” tin un hogar den Museo Arqueologico

Dia 23 di november ultimo e artista contemporaneo Osaira Muyale y Museo Arqueologico Nacional Aruba (MANA) a firma un acuerdo pa tempo indefini pa e obra menciona ariba ta exponi den e Museo.  Osaira ta tambe e creador/autor di e mahestuoso cabaynan blauw den centro di Playa. 

E cabay drumi abou, parti den dos, di cua uno tin e escudo di Aruba y e otro e escudo di Hulanda, ta hala nos atencion na diferente ruptura cultural cu a tuma luga den e proceso di colonisacion.

E ruta triangular di comercio di siglo 16 pa siglo 18 entre Europa, Africa y Merca (specialmente Caribe) a forma un empresa economico.  Na mes momento esaki a interferi y kibra e manera di bida y cultura di e hendenan envolvi cu desplasamento y sclavisacion. Sinembargo, ta a traves di e division- y reconexionnan aki cu identidad nobo y cultura di awe a keda forma.

Ainda nos tin di haber cu e consecuencianan di colonisacion y e obra di Osaira Muyale ta accentua e aspecto hibrido di e luganan antes colonisa. Na mes momento e ta ilustra e desconexion cultural y e falta di comprendemento cu ta existi te dia di awe.  E colonianan di antes y structuranan politico di awendia ainda ta conecta y separa pa e lama blauw inmenso. 

Den su obra, e narativanan personal como un yiu di un pareha mixto (Hulandes y Rubiano), y e narativanan nacional, manera Aruba su Status Aparte den Reino Hulandes, ta keda explora y ta sclama pa dialogo. Arte como simbolo di e esfuerso di un nacion Caribense pa comprende su mesun historia y tin su propio bos.

A celebra formalisacion di  combenio y cooperacion entre Osaira Muyale y MANA di un forma simbolico. Hunto a bebe koffie cola cu pan dushi y buscuchi speculaas. A explora posibilidadnan p’e artista y MANA sigui traha hunto pa medio di investigacion, educacion y arte. A planta un simia mas y ta hunto lo percura pa sigui traha na desaroyo cultural di Aruba.