E gran peliger cu ta existi ora nos compromete nos fe

Mi rumannan stima, mientras cu mi tabata haci tur esfuerso pa skirbi boso di nos salbacion comun, mi a sinti e necesidad di skirbi boso, y spierta pa lucha seriamente pa e fe, cu un bes y pa semper a wordo entrega na e santonan (Judas 1:3).

Pasobra cierto persona a sluip drenta sin cu ningun hende a ripara, esta esunnan cu for di hopi tempo a wordo destina pa e condenacion aki, e hendenan sin compasion (impio), kendenan ta cambia e gracia di nos Dios den libertinahe y ta nenga nos unico Maestro y Señor, Hesus Cristo (Judas 1:4).

Ta masha importante pa nos tene cuenta ora nos ta tuma cierto trabao of encargo, of posicion y mas ainda cera aliansa y amistad cu hende pa nos no compromete nos fe.

Nos tur ta na altura con den e buki di Daniel capitulo 6, a forsa Daniel pa compromete su fe y su bida a core peliger. Daniel a bay resulta den cueba di leon. Pasobra for di den capitulo 1 Daniel a propone den su curason pa no contamina cu mes cu e miho cuminda di e rey, ni cu e biña cu e rey tabata bebe.

Ora nos compromete nos mes pa placa, posicion, y fama, e diabel ta pusha nos den e caminda cu nos tin di gaña pa keda bon cu hende. Of bay contra Dios su principio, statuto, ordenansa, y mandamento, pa asina mantene bon relacion. Y poco ta realisa con profundo e pos ta cu despues cu bo drenta salimento ta bira dificil, pasobra e diabel ta mara pia di hende.

Den tur acuerdo cu nos ta cera, con importante, bunita of grandi cu e por ta, nos mester sa si e ta agrada Dios. Y si e acuerdo no ta pone nos faya cu Dios, pasobra na final di cuenta nos tur tin di duna cuenta na Dios.

Pasobra e mente fiha riba e carni ta morto. Ma e mente fiha, riba e Spirito ta bida y paz. E mente fiha riba e carni ta enemistad contra Dios, pasobra e no ta somete su mes na ley di Dios, como e no ta capaz pa haci esey tampoco. Y esunnan cu ta den carni no por agrada Dios (Romanonan 8:6-9).

Mira pa ningun hende no coge boso preso door di filosofia y engaño vano, segun tradicion di hende. Segun e principionan elemental di mundo y no segun Cristo (Colosensenan 1:8).

Diabel ta capaz di hinca hende den un situacion, cu ora bo kier sali for di algo cu no ta agrada Dios y cu ta compromete bo fe y cu ta un bofta den cara di Dios di asocia cu hende cu ta stima Dios pa nomber y no pa curason. Bo por wordo considera como un gran traidor y cu tur represalia cu por wordo tuma contra bo.

Pasobra bo compromiso a haci bo hopi vulnerabel y mas dependiente di hende cu di Dios (Revelacion 3:15-16).

Ora un homber y un muhe ta contrae matrimonio no mester wak solamente e placa, bunitesa, bon tipo, cas, bon curpa, pero mester tene cuenta cu e persona cu bo ta bay casa cu ne ta stima Dios. Pasobra di esey bo felicidad ta depende.

Pasobra si e persona ta stima Dios, e lo stima bo y respeta bo.

Bo no por drenta ningun fortaleza mundano, di inmoralidad, corupcion, impuresa y maldad y kere cu ora bo ta aden bo por cambia cos, corda cu e murayanan di Jericho a wordo tumba di pafo.

Sinceramente,

Pastoor Marcel Balootje.