E bario ta suplica: Cera e cachonan di dump riba dump

Un biaha mas habitantenan di Parkietenbos ta keha di e cachonan straño, cu hamber y brabo cu ta biba riba dump. E cachonan ta drenta cura di cas anochi y mainta ta rondia cuminda. Nan ta cana benta barinan abao, plama sushi, den nan afan pa busca cuminda. Algun dia pasa un grupo di e cachonan aki a ataca un homber riba su bicicleta. 

E cura rond di dump ta tur kibra y e cachonan aki ta sali varios biaha pa dia y cana rond molestia den e barionan. Stichting Parkietenbos ya a haci un apelacion riba City Inspector y na Gobierno di Aruba pero nada a wordo haci ainda. Stichting Parkietenbos ta dispuesto pa contribui cu cuminda pa e cachonan aki keda cera riba e dump of na un sitio asigna te ora cu haya doño pa nan. Pero no ta husto cu e muchanan y e grandinan di bario di Simeon Antonio y Parkietenbos tin cu biba intimida. 

Si un grandi cana bay tienda den bario, e por conta cu pafo tin cacho ta sper’e. Si muchanan of hende grandi sali cana of pa core bicicleta, e cachonan cu hamber ta bin ataca. No ta husto pa hende biba asina, p’esey ta urgi City Inspector y e minister concerni, pa actua pa caba.