E balor di matrimonio y union den famia ta apreciabel den bista di Dios

Tin hopi cos cu nos ta mira ta sosode cu nos ta puntra nos mes, si e muchanan ey si nan mayornan sa sinta y papia cu nan. Pasobra pa falta di atencion, hopi mucha ta bay den un direccion hopi tristo.

No tin nada cu mas balor cu un famia uni den Señor, pasobra ta Señor a forma tur famia, sea pober, rico, mahos, bunita, of elite. Ta Señor a forma tur den Su amor, pero hopi biaha nan ta aparta for di Dios y asina consecuencia fuerte y doloroso ta tuma luga.

Dios bendiciona tur mama y tata soltero cu ta lucha tur dia, pa asina lanta nan yiunan cu respet y balor. Hasta esunnan cu pa un of otro motibo por a divorcia, Dios duna nan e sabiduria pa no entrega, pero sigui curasha nan yiunan riba e bon caminda.

Dios ta aprecia un famia uni pasobra esey ta boluntad di Dios (Salmo 133). Un Famia ta consisti di un homber, un muhe y nan yiunan. For di principio di mundo famia a wordo bringa fuertemente, pasobra un famia uni ta algo na prome luga spiritualmente poderoso, den bista di Dios, specialmente ora nan ta reuni pa adora Dios y despues nan lo ta exitoso den tur cos pasobra nan a pone Dios prome luga.

Nos ta bibando den un tempo cu mundialmente un grupito kier uni den matrimonio, pa forma famia, den cual e oportunidad pa nan por tin yiu no ta existi.

Pero e enemigo a hinca den mente di hende, mescos cu tempo di Adam y Eva y di toren di Babel, pa nan bay contra Palabra di Dios.

Pasobra homber cu homber no por traha yiu, tampoco muhe cu muhe no por traha yiu.

P’esey, biologicamente no ta existi un igualdad, pasobra locual Dios a pone den un matriz di un muhe, no por wordo copia cientificamente, ni spiritualmente tampoco ta existi igualdad pa motibo di locual Dios a establece den Genesis 2:24. Esey ta cu e homber lo bandona cas di su mama y su tata, y lo uni cu su muhe. Nan dos lo ta un solo carni.

Esaki ta nifica cu mundo ta den un situacion caminda hende kier rechasa palabra di Dios y riba papel bini cu algo cu ta aproba inmoralidad.

Awor pakico rechasa Dios y bay haci algo riba boso mes (Galationan 6:7-8) (1 Corintionan 6:9+10).

Y no ta un tema pa discuti riba dje y perde tempo, pasobra locual Dios a establece hende no por cambie.

Y pa acepta e boluntad di Dios no ta costa hende nada, simplemente mester laga los di orguyo y banidad.

P’esey den 1 Corintionan 6:11-20, Dios den su misericordia ta ofrece oportunidad na tur esunnan cu kier biba den Su boluntad y obediencia.

E enemigo kier desvia hopi hende for di e caminda di Berdad, pasobra e sa cu e tempo di cosecha di Dios ta yegando, y locual e no por logra spiritualmente, pasobra Cristo a paga e prijs pa nos salbacion na Cruz di Calvario, e ta purba di hacie carnalmente.

Como famia nos no mester laga nada separa nos for di otro. Y nos tur mester tin Dios na prome luga.

Tin hopi famia cu ta desea di reuni, pero e enemigo di alma di hende a daña hopi relacion familiar, y nos tin cu pone esey den oracion pa pas por reina den cada cas.