DVG: Como boostershot ta suministra vacuna Bivalent den bario

DVG su team encarga cu vacunacion ya caba ta presente den diferente bario cu e unidad mobil di Bureau Rampenbestijding pa asina brinda comunidad e vacuna Bivalent di Pfizer mas cerca di cas.

E vacuna Bivalent di Pfizer ta ‘target’ e subvariantenan di e variante Omicron cu ta circula y premirando e posibilidad cu fin di aña por trece aumento den e casonan di COVID, DVG ta recomenda tur ciudadano cuminsando for di diesdos aña cu tin minimo dos vacuna caba ricibi pa busca nan vacuna Bivalent. E vacuna Bivalent lo ta duna unicamente como boostershot, esaki significa cu pa por ricibi e vacuna e ciudadano mester tin minimo dos vacuna ricibi caba. E ciudadanonan di 60 aña of mas cu tin tres of cuater vacuna ricibi caba, tambe ta bin na remarca pa ricibi nan siguiente boostershot como e vacuna Bivalent.

E fecha y orario unda comunidad por acudi pa busca nan vacuna den bario ta como lo siguiente:

·         Centro Deportivo Frans Figaroa na Noord dia 17, 18, 19 di october for di 8:30 di mainta pa 3:30 di atardi non stop.

·         Centro Deportivo Betico Croes na Santa Cruz dia 24, 25, 26 di october for di 8:30 di mainta pa 3:30 di atardi non stop.

·         Stadion Joe Laveis na San Nicolas dia 31 di october y prome, 2 di november for di 8:30 di mainta pa 3:30 di atardi non stop.

Pa por ricibi e vacuna Bivalent e ciudadano mester presenta cu su carnet di AZV of su AZV digital, su Aruba Health App, forma di identificacion (ID) y si tin ainda e pruebanan bieu di vacunacion.

Durante e dianan cu DVG ta vacunando den bario cu e unidad mobil, prikpost DVG lo ta habri tambe for di 8:00 pa 11:45 di mainta y atardi for di 1:00 pa 3:45.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200/ 2800101 of e-mail nos na [email protected].