Durante simposio: Koningin Wilhelmina Fonds a enfatisa rib’e importancia di haci test pa cancer di pecho

October ta luna di conscientisacion di cancer di pecho. Esaki t’e motibo tambe pa cual Koningin Wilhelmina Fonds a organisa un simposio tocante cancer di pecho, den Cristal Theater, diasabra ultimo.

Despues di e pandemia, e fundacion a keda como dos aña cu e no a tene su charlanan manera sa ta e custumber. Presente n’e simposio tabata t’ey e specialistanan manera dr. Daryanani, e oncoloog, dr. Ladenius y e radiologo, dr. Torres cu ta traha na ImSan.

E cantidad di casonan di cancer di pecho a aumenta den e ultimo temponan y esaki ta e caso tambe cerca e cabayeronan. Lily Prince, presidente di Koningin Wilhelmina Fonds a bisa cu nan ta nota esaki na momento cu e pashentnan bati na nan porta pa ayudo.

Manera tur hende sa, ya niun pashent ta bay exterior, pero ta haya nan tratamento aki na Aruba mes. Y aki na Aruba, Koningin Wilhelmina Fonds ta brinda transporte na esunnan cu tin dificultad cu esaki. E fundacion ta paga esaki pa e pashent, pa e por bay specialista, hospital pa nan checkeo na laboratorio, nan radiologio y tambe pa kimoterapia. Pero ta gradici comunidad Arubano, specialmente Rotary Club cu a yuda pa organisa e simposio aki.

Presidente di e fundacion a indica cu e ijs a kibra pa busca informacion y conscientisacion tocante cancer. Hopi biaha tin hende cu ta bira cara otro banda, ora cu nan wak un persona di un di e fundacionnan di cancer, como sifuera cu ta e persona ey mes tin cancer. Segun Prince a indica, e comunidad mester ta mas consciente di kico ta come y bebe den e malesa di cancer. 

El a resalta e importancia di bay dokter y haci bo testnan regularmente, principalmente si e persona tin historia di cancer den su famia. Hopi biaha tin miedo di papia tocante cancer. Pero mester ta consciente pa haci test. Durante e simposio a trece dilanti e importancia pa e damanan di entre 45 y 75 aña haci nan checkeo di pecho. “Ora di c’un persona haya un carta di Stichting BOB na cas pa bay haci nan checkeo, pa no tira esaki un banda. Bay haci test, esaki ta di suma importancia pa e salud di un hende muhe. Hopi biaha dokter conoce famia, pero hopi biaha e dokter no sa kico ta come y bebe den un famia. Ta hopi importante pa ta sincero cu e dokter, pa pidi e dokter pa haci un test pa tin mas siguransa,” Lily Prince, Presidente di Koningin Wilhelmina Fonds a finalisa bisando.