Durante Rijksministerraad: Bouquet di flor pa Ady Thijsen

El a sinta den mas di un reunion di Conseho di Minister di Reino Hulandes caba, pero mas bien como reemplasante pa Minister Guilfred Besaril. Pero awo cu el a huramenta recientemente, el a sinta den e prome reunion den forma oficial. Y cu esey a celebra cu ne, esta tur e minisrernan di Hulanda, di Coraou y di Sint Maarten. A regal’e un bouquet di flor, como muestra di aprecio y pa desee hopi forsa cu e funcion nobo.

E puesto di Minister Plenipotenciario di Aruba na Hulanda ta bin manera un soño pa e politico procedente for di Savaneta. El a purba na aña 2017 pero no a pasa “screening” pa por bira minister. A ora e mester a conforma su mes cu e funcion di Presidente di Parlamento. Pero despues cu Gabinete MEP-POR-RED a cay algun luna prome cu eleccion, a yama eleccion y Thijsen a bolbe purba pa haya dicho funcion. Di december e ta na Hulanda pero a logra regla tur cos pa hurament’e te na october.

A nombra mr. Juan “Ady” Thijsen tambe como representante permanente di Aruba na Europa. E ta sigui Cedric Tilma cu a ocupa e funcion tempo di AVP y despues Eddie Paris durante e prome gabinete Wever-Croes. A dicidi l cu pa e di dos termino, lo postula Thijsen na Bruselas, pa cual el a entrega su asiento den Parlamento, cu a pasa pa Ricky Hoek.

E funcion di representante den EU
Ta bon pa splica cu e representante permanente di Gobierno di Aruba na Union Europeo, ta representa e interesnan di Aruba den Union Europeo. E cuater paisnan miembro di Union Europeo, esta Hulanda, Francia y Dinamarca, cada un tin un Representacion Permanente na Bruselas. Desde januari 2018, Edmond (Eddy) L. Paris MBA tabata e Representante Permanente di Aruba na Bruselas. E tabata tambe miembro di e Comision Ehecutivo di e asociacion di paisnan y teritorionan di ultramar (http://www.octassociation.org/), den cual e colonianan bieu di e paisnan miembro di Union Europeo ta hunto.

Tocante Ady Thijsen
Mr. Juan Edberto “Ady” Thijsen, ta casa, tin 4 yiu y 2 nieto. El a studia ley y ta un abogado di profesion, specialisa den leynan laboral y derecho constitucional. El a drenta arena politico na aña 2005, riba lista di MEP. Den su prome salida el a logra 818 voto, esun mas hopi te dia di awe! Den eleccion na aña 2009 el a cay den voto y a baha te na 414 voto, net mita. Den eleccion di 2013 el a crece un poco y yega 475 voto. Den eleccion na 2017 el a bolbe crece y a yega 511 voto riba su nomber. Na 2017 el a ocupa e puesto di Presidente di Parlamento di Aruba, aunke cu su preferencia lo tabata e puesto di Minister Plenipotenciario di Aruba na Hulanda, pero esey no a logra. Den ultimo eleccion na juni 2021, su votonan a baha te na 183 voto, e resultado mas malo den henter su carera politico.

Tocante Minister Plenipotenciario di Aruba na Hulanda

Minister Plenipotenciario di Aruba na Hulanda actualmente ta Ady Thijsen, el a huramenta dia 13 di october 2022. Un Minister Plenipotenciario no ta un “Minister” igual cu e otronan pasobra e no ta responsabilisa na Parlamento, sino ta raporta directamente na e Minister Presidente. E ta forma parti di Conseho di Minister di Reino na Hulanda pero no ta forma parti di Conseho di Minister di Aruba. Por invit’e pa atende si ta necesario.

E lista di Minister Plenipotenciario ta data desde nos Status Aparte, ora cu John Merryweather a asumi e funcion como e prome GevMIN di Aruba na anja 1986.

John Merryweather (PPA), 10 di januari 1986 pa 11 di februari 1989.
Roland Lacle (MEP), 9 di februari 1989 pa 7 di maart 1991.
Ella Tromp-Yarzagaray (MEP), 8 di maart 1991 pa 1 di maart 1993.
Candelario “Booshi” Wever (MEP), 2 di maart 1993 pa September 1994.
Mito Croes (AVP), September 1994 pa 30 di october 2001.
Ella Tromp-Yarzagaray (MEP), 30 di october 2001 pa 7 di november 2005.
Frido Croes (MEP), 8 di november 2005 pa 31 di october 2009.
Edwin Abath (AVP), 1 di november 2009 pa 13 di november 2013.
Alfonso Boekhoudt (AVP), 14 di november 2013 pa 1 di november 2016.
Juan David Yrausquin (AVP), 16 di november 2016 pa November 2017.
Guilfred Besaril (MEP), 20 di november 2017 te 30 di juni 2022.
Juan “Ady” Thijsen (MEP), 13 di october 2022 te awendia.
Por nota cu den historia di Ministernan Plenipotenciario na Hulanda, ta Ella Tromp-Yarzagaray y Guilfred Besaril so a ocupa e puesto na dos ocasion, aunke cu den ambos ocasion, no a bay dos periodo completo.

Politico activo como Minister Plenipotenciario
No por bisa cu semper e funcion ta ocupa pa un politico, pero si cu semper e ta parti di negosacion ora di forma un coalicion den gobernacion. Ora AVP a tuma gobernacion na aña 2009, como cu a gana su so, no mester a negocia e funcion cu ningun otro partido. A apunta Edwin Abath, un politico retira, den e funcion. Despues a apunta Alfonso Boekhoudt, un profesional cu a sali di Aruba Ports Authority (nunca tabata politico) pa bay representa Aruba na Hulanda. Na 2016, a apunta Juan David Yrausquin, un politico retira, den e funcion. Pero na 2017, despues di eleccion a bolbe apunta un politico, Guilfred Besaril di MEP, den e funcion. Na 2017 e tabatin 508 voto y na 2021 nan a baha te cu 203 voto. Pero, di otro banda, Ady Thijsen (MEP) awo ta ocupa e funcion cu unicamente 183 voto riba su nomber.