Duanero den accion pa exigi gobierno cumpli cu decision di hues

Diabierna mainta a tuma lugar pa 8’or, un accion di parti di e empleadonan di seccion Vrijmaking di Departamento di Aduana. E welga di un ora a bin despues di a yama un reunion extraordinario cu nan sindicato y tabatin como obhetivo, manifesta nan malcontento pa e manera con Minister Xiomara Maduro y Minister Evelyn Wever-Croes ta ignora nan diferente intento pa ehecuta e pago debido di autotoelage. Esaki ta un asunto cu tin varios aña andando.

Edward Maduro, presidente di sindicato SADA a splica cu e 15 trahadonan di Vrijmaking nan buchi a yena. Nan ta haciendo uzo di nan auto personal pa haci trabou pasobra Cuerpo di Aduana no tin dienstauto disponibel. Pa cu esaki nan mester ricibi un autotoelage ekivalente na un suma di 700 florin, segun e propio maneho estableci pa gobierno na 2017. Sinembargo, ta pagando solamente 300 florin.

Despues di a bay corte y gana algun di e casonan, Hues a bisa cu mester paga e trahadonan segun kilometer cori, pero gobierno a bisa cu esey lo bira demasiado trabou administrativo. Den Hoge Beroep na juni ultimo, tur funcionario a gana nan caso y Hues a dicta cu mester paga nan e suma completo.

Segun e sindicalista, entre ministernan y DRH cu mester ehecuta e pago, ta tira e bala den scochi di otro. Pero di otro banda, e un ora di accion cu e Duanero ta tuma pa reclama su derecho si ta core kita di biaha for di nan salario. 

Pa e relato completo, lesa TREMPAN