Duana a cuminsa confisca tas di marca falso na aeropuerto

Na duana aeropuerto tin un preocupacion, pasobra tin un dobel maneho. Tin un fiscal nobo na Ministerio Publico cu a pone cu a pone regla cu na momento hende drenta cu mercancia “fake” cumpra den exterior via aeropuerto, nan ta tuma nan den beslag.

Hopi hende cu bay vakantie den exterior gusta cumpra y bin cu nan. Por ehempel, hende ta bay cumpra un tas di marca caro pero ta hay’e na 15 dollar, mirando cu sa cumpra mercancia fake, y kier paga invoerrechten. Pero awo Ministerio Publico a bin c’un maneho nobo. Segun e fiscal, esaki ta algo strafbaar. Den pasado husticia a coy mercancia fake den beslag despues cu a haya sa unda ta bende nan.

Ora di bin fo’i exterior cu mercancia fake pa bende esey no ta aceptabel pa ley, ta consider’e pirateria. Ta haya kiosco cu ta bende mercancia fake y esey no por, pasobra ta mustra cu Aruba ta participa na pirateria, na ilegalidad.

E fiscal nobo aki a cuminsa n’e parti di tuma den beslag na yegada e mercancianan fake. Pero e carganan cu ta drenta na waf si nan no ta tuma den beslag. Duana tin di meld esaki pa asina por procesa un multa contra e comerciante.

DOBEL MANEHO

Awo tin problema, pasobra ta hiba dos tipo di maneho na aeropuerto. Esaki ta bin pa motibo cu un hefe si ta laga pasa e mercancianan aki, mientras e otro no ta laga esey pasa y ta tuma nan den beslag. Aki por mira claramente cu no tin un maneho concreto di duana na aeropuerto.

Incluso no tin un solo maneho riba controlamento di importacion na waf y aeropuerto. E maneho aki no ta bon pa motibo cu e persona yega na aeropuerto c’un articulo fake, esey si ta kit’e. Pero e comerciante cu ta bin cu container di mercancia pa su negoshi si ta laga pasa.

NO POR KITA MERCANCIA

Pero ningun duanero por kita mercancia pasobra nan ta sospecha cu e mercancia ta uno fake. Si kita un mercancia fake, ta kita tur y mester busca un experto pa controla esaki.

Pa por kita mercancia fake of di pirateria, mester tin denuncia haci sea di comercio of otro instancia (doño do curpa) na polis of Ministerio Publico (OM na Hulandes). Asina aki OM por duna orden pa wanta e mercancia fake. Aduana riba su mes no por yega haci algo asina, pasobra nan no ta bevoegd pa haci esey.