Dr. Kawaaiah na gobierno: No hunga politica cu salud y busca experto cu sa di e parti tecnico

Den forma di exclusividad, dr. Kawaaiah a duna 24ora.com/TREMPAN un entrevista den cual, pa prome biaha, ta trece su banda di medaya den henter e bataya legal cu el a pasa aden e aña aki. Despues di a gana caso contra gobierno, e ta bek na Aruba. Por corda con e specialista dental a keda deteni bou acusacion di a falsifica diploma.

For di e tempo ey, su practica ubica na  Cumana a cera permanentemente y su pashent mester a busca otro caminda pa haya tratamento. Segun dr. Kawaaiah, tur loke a pasa cu ne tabata politicamente motiva. E ta conta con keto bay universidadnan na Merca ta pag’e pa duna lectura y cu aworaki e kier djis drecha su nomber pa e bay di Aruba y sigui cu su profesion na paz.

El a conta cu el a bin Aruba pasobra su tres yiunan a inscribi pa atende Xavier University. AZV ta esun cu a acerca su persona bisando cu dokter Walker ta mucho grandi caba y nan mester di un hende pa reemplas’e. El a mustra nan su diploma como Advanced Clinic Orthodontist y con e ta duna les na universidadnan grandi. Esey a pone cu el a haci un inversion grandi na Aruba, di riba dos miyon florin pa cumpra edificio y trece ekipo sofistica. Tur su clientenan tabata contento y satisfecho cu su practica y e tecnolocia cu el a trece Aruba. E tabata yuda hende cu ta ronca y cu tin sleep apnea cu otro specialista tabata manda p’e.

Despues cu e gobierno anterior a dune un Ministeriele Beschikking (MB) pa tres aña, Minister Dangui Oduber a dune pa un so y despues a keda nenga basa riba e argumento cu e no tin paspoort Hulandes y cu su diplomanan no ta bon. E problema cu dr. Marsman, segun Kawaaiah ta pensa, a bin despues cu el a cumpra e tereno dilanti di e dentista su clinica na Noord. E ora ey a cuminsa bisa cu su diploma ta falso y cu e no ta un bon ortodontista. “Mi no ta contesta e of ningun hende pasobra mi ta sigur di mi diploma, di mi tecnica y di e manera cu mi ta trata mi pashent. Tur hende ta contento cu mi,” asina dr. Kawaaiah a declara.

Su mensahe pa gobierno di Aruba ta pa nan ta mas transparente; pa ta mas democratico. E kier pa gobierno di Aruba contrata un hende di e tereno di dentista pa nan departamento pasobra lamentablemente nan no tin ningun hende cu ta compronde kico e trabou ta. A bisa cu e no ta e unico tin mas dokter ta keha di e mesun problema.

Pa e relato completo, lesa edicion di TREMPAN