DOW a dal turismo un sla duro bou faha awe

Ta algun luna caba tin critica for di comunidad y di tur esunnan cu ta biba di turismo, cu nos tin un problema serio cu maneho di awa preto. Te cu awo DOW ta encarga cu esaki pero pa e ultimo añanan no ta capaz pa tene bou control. E problema tur hende sa, pero aki tur hende, incluyendo DOW, kier keda bon cu gobierno y ta prefera keda keto y laga e baca hoga na pos!

E reto grandi ta cu henter e sistema ta anticua y mester un cambio urgente. Separa di e sistema di rioolering den centro di ciudad y den area hotelero, tambe ta necesario pa renoba of cumpra un planta di purificacion nobo. Minister Ursell Arends a bula’den y a bisa di lo solucion’e pero te cu awe nada. Te awe ainda e problema ta mesun cos y ki ora Bubali Plas yena, ta habri sluis laga awa sushi bay lama…sin cu ningun hende ta haci nada.

E solucion? Inverti riba 16 miyon florin den un planta completamente nobo y moderno. Gobierno a pone riba presupuesto pero despues a kit’e bisando cu un compania estatal lo tuma e proyecto over.

Ta necesario pa privatisa maneho di awa preto na Aruba y mester cobra tur cu ta haci uzo di e sistema aki, incluyendo hotelnan. No por ta cu e hotel ta cobra e huesped tanto placa di estadia pero ora flush WC ta gratis, esey ta pa cuenta di gobierno. Un hende mester cubri e gasto pa e awa sushi ey yega Bubali Plas, pa proces’e y combirtie den awa industrial of cu por bende agricultornan pa planta mata. Awendia nada ta pornada mas!

Den conseho cu a duna gobierno algun aña pasa caba a bisa pa privatisa Bubaliplas. E motibo ta pasobra gobierno ta tarda den haci pago, no ta capaz pa haci mantencion preventivo y no tin placa pa mantene piesa den stock. Awo ta asina leu cu tin pensa di pas’e pa un compania estatal pero no ta nota movecion.

Locual si pueblo a nota awe ta cu e sistema a plug tur parti y awa di pos a cuminsa sali di e sistema di riool dilanti waf na Playa y banda di hotelnan cerca di Eagle Beach. Ta imposibel cu na aña 2022, Gobierno ta atrae cantidad di turista pa nos isla y ora yega nan mester cana den awa sushi cu un holo masha desagradabel. E ta demostra cu nos destinacion, en bes di progresa pa bira un isla di cinco strea, cu nos ta bahando di calidad.

Pero e reto ta mas serio. Esaki ta contesta riba e criticanan riba maneho di DOW. E departamento awo ta “pa su cuenta” pasobra Gabinete Wever-Croes II a opta pa pone bou minister-president, cu tin hopi otro asunto pa atende. DOW y DIP semper a resorta bou di Ministerio di Infrastructura pero como cu nan ta bou investigacion penal, a opta pa no dun’e na ningun minister. Prome Minister a imagina cu su so lo por, pero realidad ta cu su departamentonan ta sufri hopi. E idea pa de-politisa e departamentonan y laga e directornan mes maneha, ta resulta awo cu un realidad cu nan no ta capaz! Pasobra cu tin problema di rioolering no ta asunto di minister, sino di e director cu ta gana un bon salario pa djis keda keto, keda bon cu gobierno y no traha mucho duro.

Awe sin duda e maneho “con cu ta” aki a resulta den un sla bou faha pa nos turismo. Den port’i waf di Playa, cu tres crucero para den waf cu miles di turista canando den centro di ciudad, cu polis mester a pone palet na suela pa turista no cana den awa di pos. Y mientas polis ta purba soluciona e problema, DOW ta perdi y mirando futbol.

Ta momento pa cada director tene honor na nan mes. Ex-minister Otmar Oduber, prome cu el a baha a pidi DRH pa laga Marlon Croes bay. Pero cambio di minister a manera cambia e decision y el a sobrebibi. Awe, su departamento DOW ta den e mesun situacion of pio, cu e mesun retonan y ainda e no ta realisa cu kisas t’e mes ta e problema pasobra e no ta capaz di maneha un departamento asina importante of di presiona gobierno pa tuma decisionnan pa caba.

Awo nos prioridad ta drecha un stupi, e trapi pa subi Hooiberg, un cruz pa Santa Cruz y nos centro di ciudad mes, unda e curason di nos turismo ta bati, ta laga abandona y pa su cuenta. Danki DOW, pueblo ta hopi orguyoso di boso sabiduria y boso bon trabou!