Dos trahado di Guarda Nos Costa interoga como sospechoso

E maneho di estranheria na Aruba cu metemento di politica of di mandatarionan ta haciendo hopi daño na Aruba. Awendia traha na cierto departamento caminda cierto minister kier haci cosnan cuestionabel, por conduci tambe na persecucion pisa. Nan ta haci nan best pa busca manera di kita bo for di caminda pa acomoda un ilegal.

Actualmente tin dos trahado di Guarda Nos Costa cu ta sospechoso. Den fin di siman Landsrecherche a interoga ambos. Ningun di nan ta deteni y ambos ta trahando. Aki ta trata di e trahado fam Philips y tambe Perez. No ta descarta cu mas trahado di Guarda Nos Costa por ser yama pa interogacion of bira tambe sospechoso.

E sospecho riba e dosnan aki ta pa maltrato y cu esunnan di Guarda Nos Costa a horta su libertad. Esaki ta mesun ilegal Mycol Chavez cu a uza un storia cu e ta ser busca na Venezuela y cu mester dune asilo politico. A nenga su peticion di asilo na Aruba. El a scond’e te cu nan a tope den Playa y asina nan a detene y hibe GNC unda a logra deporte.

E mama tambe a nenga su peticion di asilo y ta cana rond den forma ilegal riba Aruba. E mama ta yama canalnan latino den exterior papia masha malo di autoridad di Aruba. E ta traha ilegal na Aruba p’asina por mantene su mes durante su estadia. Dia nan topa cu e mama, e tambe lo ser poni riba avion pa bay bek su pais. E abogado Boyce cu a defendenan no a busca manera di hiba su cliente GNC despues di perde un sin fin di caso relaciona cu nan estadia ilegal na Aruba.

Di e clientenan aki y hopi otro mas abogado Boyce a perde defendiendo e ilegalnan. E denuncia contra esnan di GNC a ser haci na Ministerio Publico prome cu el a bandona Aruba. Tur biaha cu nan a bay corte nan a perde y e proceso di GNC tabata legal y segun ley di admision. E denuncia ta uno caminda el a lanta contra e trahadonan di GNC te cu tin trahado di GNC a keda herida. E hefe di GNC tambe a sufri daño fisico pa e forma cu Mycol Chavez a lanta contranan.

Mester a traha duro pa domine y mande tera. Vrijheids Beroving y Mishandeling ta e dos sospecho cu tin contra e trahadonan y ta e denuncia haci pa e ilegal cu awe no t’ey mas. Pa algun ora Landsrecherche a interoga e sospechosonan y despues nan por a bay bek. Lo keda pendiente pa mira te con ley e denuncia di Mycol Chavez lo yega. Ora cu bo ta ilegal na Aruba pa dos aña y nunca nan a saca bo permiso, bo keda gara pa esnan di GNC bo estadia na Aruba a caba.

E ta conta pa Chavez y su mama. Esey nan mester compronde. Aruba por ta un paraiso pa bo biba como ilegal y gana placa sin paga belasting, pero ora cu autoridad atende cu bo, bo mester acepta cu e bida dushi a caba pa bo na Aruba. Ningun pais bo por biba cu status ilegal.