Dos ruman ta biba eynan: Cas a kima completo na Brazil

Diasabra mainta alrededor di 10:30 am, a despacha no menos cu tres unidad di Cuerpo di Bombero pa un cas situa na Brazil # 43-E. Polis cu tambe a yega mesora na e candela a scucha for di bisiña cu ta dos ruman ta biba den e cas. Ningun di dos tabata presente na e cas, pues no ta conoci origen ni causa di e candela. Si a constata cu e cas a kima completo.

Bomberonan na e sitio a purba scapa mas cu tabata posibel pero e candela a expande lihe y a kima henter e cas y e pertenencianan paden.

Polis a wanta publico riba un distancia sigur, pa no stroba bombero den nan trabou. Tambe a laga cera diferente crusada cu ta yega na e cas, pa evita cu trafico ta stroba bombero di core slang pa yega na awa pa combati e candela.

Recherche awo lo mester investiga, hunto cu bombero y tecniconan di Dienst Technische Inspectie, e causa exacto y tambe for di unda e candela a cuminsa. Bisiña a bisa nos cu prome cu nan kier a activa, ya a nota huma preto y diki saliendo for di e cas.