KOMUNIKADO DI PRENSA 533/2022
12 novèmber 2022

Dos detenshon pa ladronisia den kas, – di outo i – di piesa di outo.

Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Kontinuando ku un investigashon relashoná ku un kaso di ladronisia den kas situá na
Amerikaweg, algun kaso di ladronisia di outo i piesa di outo, polis a hasi dos detenshon.
Djasabra 12 di novèmber 2022, den oranan di mainta, personal di tim Joyriding i tim di
Aresto a detené dos sospechoso relashoná ku e kaso(nan) ariba menshoná.
Ta trata di e hòmbernan sospechoso:
 S.P.C., nasé na Colombia di 26 aña di edat.
 S.G.R., nasé na Kòrsou di 18 aña di edat.
E sospechoso S.P.C. a wòrdu detené na un kas na Winston Churchillweg, mientras a detené
e sospechoso S.G.R. na un kas na Amerikaweg.
Despues di e detenshon di e sospechosonan a hasi tres entrada hudisial na e siguiente
adrès – / bibiendanan;
 Winston Churchillweg,
 Amerikaweg i
 Mahuma
Durante e entradanan hudisial a haña i konfiská artíkulonan ku ta di importansia pa e
investigashon.
A presentá e sospechosonan dilanti un fiskal ouksiliar ku despues di interogashon a
ordená nan enkarselamentu pendiente di mas investigashon.