MINISTERIO KONSERNÍ ENSEÑANSA, SIENSIA, KULTURA & DEPORTE
PUBLIKÁ RIBA 08 FEBRÜARI 2023
Diskurso di Minister di Enseñansa, Siensia, Kultura i Deporte
sr. Sithree van Heydoorn
Riba dia di 8 febrüari: Dia Nashonal di Lenga Materno Papiamentu
Awe nos ta aki pa konmemorá e hecho ku 65 aña pasa, riba 8 febrüari 1958, un yu di Kòrsou patriótiko, Modesto “Chano” Margaretha a demostrá kurashi, balentia i determinashon, kibrando regla den Parlamentu pa e por defendé su lenga materno. E tabata konvensí ku e pueblo mester haña informashon di su gobernantenan den su idioma materno pa asina e por komprondé kiko ta pasa den su Parlamentu. Danki na e akto aki di nos heroe sr. Modesto “Chano” Margaretha ku reunionnan tantu den Parlamentu komo den Konseho di Minister te ku dia di awe ta tuma lugá na Papiamentu.
Gobièrnu di Kòrsou ta tuma e desishon na 2007 pa Papiamentu bira nos idioma ofisial huntu ku Hulandes. Na aña 2015 Gobièrnu di pais Kòrsou a rekonosé sr. Modesto A. ‘Chano’ Margaretha komo un baluarte i héroe dor di duna un kaya prinsipal den Band’Ariba na su nòmber den e bario di Rooi Santu. Na mes momentu a proklamá 8 febrüari komo “Dia Nashonal di nos Lenga Materno” i e periodo entre 8 pa 21 di febrüari komo periodo di lenga materno.
Gobièrnu ta haña ku ta importante pa promové konosementu i engrandesé konsenshi nashonal di nos pueblo di Kòrsou, tokante tur asuntu ku ta regardá nos idioma Papiamentu, nos idioma materno di nos puebo, ku ta di balor emanisipatorio, kultural, folklóriko, deportivo, edukatio i sientífiko. P’esei awe Gobièrnu ta rekordá i rekonosé tur e personanan ku meskos ku sr. Modesto “Chano” Margaretha, a traha duru i ta trahando duru riba e desaroyo di nos lenga materno. Ta danki na nan trabou duru kombiná ku balentia i determinashon ku nos idioma a keda mantené i ta keda uza riba plataformanan lokal i internashonal.
Gobièrnu di Kòrsou ta konvensí ku banda di tur e trabounan ku a keda hasí kaba i e esfuerso duru di profeshonalnan ku tur dia di nobo ta trahando duru, mester di mas rekursonan pa sigui promové nos idioma materno Papiamentu prinsipalmente serka nos hóbennan.
Den siman di Lenga Materno Papiamentu nos ministerio lo tin aktividat pa diferente gremio di tur kategoria di edat, pa konsientisá tantu mucha, hóben komo adulto di bon uzo di nos dushi lenga materno Papiamentu. Nos ta pidi komunidat kompletu pa den e periodo aki kuminsando for di awe i kulminando riba dia internashonal di Idioma materno ku ta dia 21 febrüari di tur aña pa pone bon atenshon riba bon uzo di nos idioma materno.
Danki pa boso atenshon.
—
Sr. Sithree van Heydoorn
Minister di Enseñansa, Siensia, Kultura i Deporte
Dia Nashonal di Lenga Materno: Papiamentu
